Nuummi biili innarsukkut sisoortoq

Nuummi politiit sapaatip-akunnerani 49-mi julefrokostimi imigassartorsimallutik biilinik ingerlatsisut maluginiarpaat.

Tassungalu atatillugu biilit 200-jut unitsippaat, sisamallu imigassartorsimatillutik biilertutut unnerluutigineqarput.

Taakku sisamat saniatigut aqqusinermi ajutoortut marluupput, aqqusinermilu ajutoornermilu imigassaq posooqataavoq.

Innaarsukkut sisoortoq
Ajutoorneq siulleq arfininngornermi ullaakkut pivoq, tassani imigassartorsimalluni biilertoq Nuussuup Qinngorpullu akornanni aqqusinermi ajutoorpoq.

Ajutoornermut atatillugu biili aqqusernup sinaakkutaa qulaallugu assakattarpoq, innaarsuullu naqqanut 75 meterit missaani sisoorluni.

Qujanartumik aquttoq annertunerusumik ajoquserani ajutoornermit aniguivoq.

Arfininngornermi ullaap tungaani qamutit kranillit biili ajutoorsimasoq aqqusinermut qaqinnialermassuk alapernaattorpassuaqarpoq.

Qullersuaq sakkortuumik aporaa
Aqqusinermi ajutoortup aappaa, arfininngornermi aamma ullaakkut pivoq, tassanilu imigassaq aamma peqqutaasunut ilaavoq.

Tassani aquttoq imigassartorsimasoq qullersuup napparutaanut aporpoq. Aquttorlu aamma annerusumik ajoqusinngilaq.

Qaammatip sinnerani imigassartorsimallutik biilimik ingerlatsisut akiornissaanut nukippassuit atorniarlugit eqqarsaataasoq, politiit oqarput.

Imigassartorsimallutik biilernak
Taamalu kaammattuuteqarput.

- Julefrokostimut atatillugu biili angerlarsimaffinnut qimaannaruk, taava unnuami angerlalernermi tigunissaanut pileritsattoqassanngilaq.

Nuummi pisut tamaasa uani atuakkit