Nuummi atuarfik nutaaq naalagaaffimmit tapiissutinit aningaasalerneqassaaq

Kommuneqarfik Sermersuup illoqarfimmik ineriartortitsinermi ingerlatseqatigiiffiata Siorarsiorfik - Nuuk City Developmentip (NCD) - pilersaarummut siullermut neqeroortitsinissaq ulluni makkunani ulapputigileruttorpaa. Taannalu tassaavoq Nuup illoqarfiata qeqqani atuarfik nutaaq, ASK-imut USK-imullu taarsiutaasussaq.

Illoqarfimmik ineriartortitsinermi ingerlatseqatigiiffik tusagassiuutinut nalunaarummi taama allappoq.

- Pilersaarutip aningaasalerneqarnissaa maanna iluatsereernikuuvoq, tassa Nunatsinni Namminersorlutik Oqartussat 2018-imut Aningaasanut Inatsisikkut meeqqat atuarfiinut tunngasut kommuninut tunniunneqarmat, Siorarsiorfik - Nuuk City Development ilisimatitsivoq.

Atuaruk: Jens Frederiksen: Atortulersuutit siuariarnermik pilersitsisarput

Naalagaaffiup tapiissutaanit aningaasat
Tamanna isumaqarluni, atuarfinnik sanaartornermut taakkulu aserfallatsaaliorneqarnerannut atugassanik Nunatsinni kommunit ataatsimoortumik tapiissutit aqqutigalugit aningaasaliivigineqartassasut.

Kommuneqarfik Sermersooq ukiumut 32 millioner koruuninik pissarsisinneqarpoq, taakkulu aningaasat atorlugit kommune pilersaarummut kingornagullu attartornermut aningaasartuutinik siumoortumik akiliuteqarnissaanut naammapput, tassa kommunip aningaasaqarnerata sinneranut sunniuteqaataasussaanngitsumik.

Atuarfiliornermut ilanngullugu sunngiffimmi ornittakkamik (AKO) aamma meeqqerivimmik sanasoqassaaq, taakkulu atuarfittuulli Nuup illoqarfiata qeqqani Blok P-ip toqqaviginikuusaani sanaartorneqassapput.

- Taakku ataatsimoortillugit OPS-mik pilersaarutitut neqeroorutigitinneqassapput. Tamanna isumaqarluni, pilersaarummik piviusunngortitsinissamut NCD pisariaqartutigut aningaasaliissutissaqartoq, taavalu neqeroortitsinermi suliffeqarfiit ajugaasuusut meeqqerivimmik atuarfiliornermillu sanaartorlutillu ukiuni tulliuttuni 20-ni 30-niluunniit aserfallatsaaliinermik ingerlatsinermillu suliaqassallutik. Taamaalilluni uagut aamma Kommuneqarfik Sermersuup piffissami tassani aningaasartuutaasussat nalunngereerpavut, NDC-mi pisortaaneq Jens B Frederiksen taama oqarpoq.

Atuaruk: Nunatsinni inissialiornissarsuarmut pilersaarutigineqartut suli annertoorujussuupput

Atorfinitsitsineq
Atuarfiliornerup meeqqeriviliornerullu saniatigut sissaq atuarlugu aqqusineeraliornissami immikkoortup siullianut Nuup Saavaniit Saqqarliit tungaanut tunngasumik neqeroortitsinissaq NCD-mit piareersarneqassaaq. Soorlu aamma sanaartorfissagissaanerit allat arlallit aallartisarneqaleruttortut.

- Kommuneqarfik Sermersuumi Kommunalbestyrelsip aalajangigaat piviusunngortinneqarnissaannut tunngasunik aalajangiinissatsinnut sulisussat pisariaqartut atorfinitsinneqareerput. Siunissami qaninnerusumi suliassat arlaqartut neqeroortitsissutigisinnaaleratsigit nuannaarutigaara. 2018-imi ukiup affaata siulliata ingerlanerani NCD-ip suliassanut tunngasut neqeroortitsissutigisinnaanngussagai naatsorsuutigaarput, Jens B. Frederiksen oqarpoq.