atisanik ilusilersuineq
Nuummi atisanik ilusilersuisarfik allilerniarpoq
Aallartitsinermut aningaasaateqarfimmit Greenland Venturemit tapiiffigineqarlutik Nuuk Couture-mi atisanik ilusilersuisartut Københavnimi sapaatip akunnerani atisanik takutitsinermi peqataaniarput, tamannalu peqatigalugu anpartsselskabinngorlutik alliniarlutik
Nuuk Couture nunani tamalaani atisanik mutinik tuniniaasalerniarpoq.
Taamaattumik illoqarfiit pingaarnersaanni atisanik ilusilersuisarfeeraq anpartsselskabinngornialerpoq, Nuuk Couture Aps.-itut.
Taamaasiornikkut ingerlatsiviup nunanit tamalaanit piumaneqartut amerlanerusut sanasinnaalissavai.
Tassami aamma nunanit tamalaanit piumaffigineqarnerulerneq pisinnaavoq, Nuuk Couture sapaatip akunnerani atisanik takutitsinermi Copenhagen International Fashion Fairimi, Bellacentretimi aggustip 5-anniit 7-annut 2015 ingerlanneqartussami, takutitsilluarluni pisisartunik nassaassaguni.
Takutitsinermi peqataanissamut Greenland Venture tapiissuteqaqataasimavoq.
Pisortat aningaasaateqarfiannit tapersersorneqarluni Nuuk Couturep neriuutigaa nunatta avataanissaaq atisanik nuannarisallit alutornartissagaat ingerlatsiviup mutinik atisaliamini kalaallisuunit avittat qanoq isilluni atortarnerai.
Great Greenland peqataassaaq
Takutitsinissamut atatillugu Nuuk Couturep ammerivik kujataaniittoq Great Greenland isumaqatigiissuteqarfigisimavaa. Bellacentretimi takuatitsivimmi atisalianik Nuuk Couturep sanaavinut assingusunik takutitseqataassaaq.
– Ingerlatsiviit marluk ataatsimoortinnerisigut Nuuk Couturep neriuutigaa nunap iluani nunanilu tamalaani tuniniaaneq siuariartinneqassasoq, pisortaq Jeanette Holding oqarpoq.
– Nalunngilarput Ruuma ulloq ataaseq sananeqanngitsoq, maannali nunani tamalaani unammillernermi pissanganartumi sakkortuumilu peqataanissatsinnut aallartisarnialerpugut.