asimiinneq
Nuummi asimi meeqqerivimmik siunnersuuteqartoq
Borgmesteri Asii Chemnitz Narup, Kalaallit Nunaanni meeqqerivik asimiittoq siullerpaaq pilersinneqarsinnaanissaanik siunnersuuteqarpoq
Nuummi meeqqat pinngortitamut qaninnerusumik pissuseqarnissaat qulakkeerneqartariaqarpoq.
Kommuneqarfik Sermersuumi borgmesteri Asii Chemnitz Narup (IA) taama isumaqarpoq, illoqarfiillu pingaarnersaata qanittuani asimi meeqqeriviliortoqarnissaa siunnersuutigalugu.
Taama pisoqassappat nunami maani siullerpaamik asimi meeqqeriveqalissaaq.
Pinngortitaq atorluarlugu
- Nuuk 17.000-inik inoqartoq illoqarfissuuvoq, illoqarfissuit ulapaarfiusarnerisut illoqarfissuillu nukissaqartitsisarnerisut pisoqarfiusartoq. Meeqqat tamarmik asimi isumannaatsumik angalaarsinnaanerminnik periarfissinneqarnissaat pingaartuuvoq aamma pinngortitap tunniussinnaasaanik, misigisassanik nerisassanillu nuannaaruteqarsinnaanissaat, IA-p borgmesteriutitaa siunnersuummini taama nassuiaavoq. Kommunalbestyrelsip qanittukkut tamanna aalajangiiffigissavaa.
Asii Chemnitz Narupip oqaatigaa, meeqqat illoqarfimmi sungiusimasatik qimallugit asimi angalaaraangamik tamanna iluaqutissarsifigisaraat.
- Aamma ilimanaateqarnerulersarput kinaassuseqarnerulerlutillu. Pinngortitaq sunik tunniussisinnaanersoq sunillu tigusisinnaanersoq meeqqat ilinniartarpaat. Allaammi pinngortitap aamma kalaallit kulturiata qanoq imminnut ataqatigiinnerat paasisaqarfigisarpaat. Tamakku saniatigut meeqqat misissuinermikkut, pinnguarnermikkut, arpaqattaarnermikkut, pisseqattaarnermikkut, suaartarnermikkut innartornerunermikkullu ineriartornissaminnut periarfissaqarluartarput, taanna oqarpoq itisiliillunilu ima ilallugu:
- Avatangiisit, uumassusillit, uumasut, pinngortitami ataqatigiinneq aamma silap pissusia meeqqat paasisaqarfigissavaat. Aamma timimik nukinginik ineriartortitsinerat ikorfartorneqassaaq ilinniarnerannilu aallaavigineqassallutik uumassusilerineq, kulturi, oqaluttuarisaaneq, oqaatsit, timikkut qasujaassuseq aamma inooqatigiinnermut tunngasut.
Illup issunik ujaqqanilu qarmallip eqqaani
Borgmesteri meeqqerivissap sumi inissinneqarnissaanut aalajangersimasumik takorluugaqarpoq.
- Illoqarfiup avataani inissisimaguni pitsaanerpaassaaq, illoqarfik nipilioroqisoq qimaamillugu illoqarfiullu tungaanut isikkivilimmi. Sissamukarnissamut, immamiinnissamut, tatsimut kuummukarnissamullu periarfissaqassalluni, taanna erseqqissaavoq ilanngullugulu oqaatigalugu soorlu ‘Aanaap Illua’-ta eqqaaniissinnaanissaanut periarfissat ingerlatsiviup misissortariaqarai.
Perorsaasutut sulisut saniatigut aalajangersimasunik asimiinnermut ilitsersuisunik, aalisartunik piniartunillu misilittagaqarluartunik aamma arnanik aalisakkanik piniakkanillu passussinermik misilittagalinnik meeqqerivimmut attuumassuteqartunik ikiorteqartassaaq.
Borgmesterip oqaatigaa meeqqerivik asimiittoq meeqqerivinnit tamanit atorneqarsinnaassasoq, taakkulu paarlakaallutik atortarsinnaassagaat.
Meeqqeriviup biilinik tikinneqarsinnaanissaa aamma qulakkeerneqassaaq. Sanaartornissamut missingersuutinik suli suliaqartoqanngilaq; kommunalbestyrelsili siunnersuummut isumaqataassappat missingersuusiortoqassalluni.
Takorluuisinnaaneq pitsaanerusoq
Danmarkimi orpippassuarni meeqqeriviit siammarsimangaatsiarput. Pisut malunnaatillit tamakkunani misissorluarneqarmata paasineqarpoq, meeqqat orpippassuarni meeqqerivinniittut ukioqatiminnut allanut naleqqiullutik takorluuillaqqinnerusartut.
Timimik nukinginik pitsaanerusumik aamma ineriartortitsisarput, aallussilluarnerusinnaasarlutik nalinginnaasumillu isumassarsiullaqqinnerusarlutik.
Tamatuma peqatigisaanik misissuinerup paasinarsisippaa meeqqat orpippassuarni meeqqerivinniittut meeqqanut allanut nalinginnaasuni meeqqerivinniittunut naleqqiullutik napparsimakulannginnerusartut.
Pinngortitap meeqqat misigissusaat, nukii saarngilu ineriartortittarpai aamma soorlu Danmarkimi nalilersuinermi oqaatigineqartutut pinngortitaq ilikkagassanik ilisimasassanillu killeqanngitsumik tunniussisarpoq.
Nuuk pillugu allaaserisat allat Ugeavisimi saqqummeqqammertumi atuakkit