aqqusinermi ajutoorneq
Nuummi aqqusinermi ajutoortut arlaqartut
Apiutigaluni sakkortuumik anorlernera illoqarfiit pingaarnersaanni aqqusinikkut angallannermi ajornartorsiortitsingaatsiarpoq. Bussit timmisartuussinerillu unitsinneqarput.
Biilit arlaqartut aporput, kisianni qujanartumik inunnik suli ajoqusertoqanngilaq, Nuummi politiineersoq ilisimatitsivoq.
Ajutoortut arlallit aamma tunuleriiaattut
- Biilit angalaartitagut ajutoortunut arlalinnut ornigupput. Aqquserngillu arlaleriarluta aaqqiivigisariaqarsimavagut, tunuleriiattorpassuaqarnera pissutigalugu, politiit Sermitsiaq.AG-mut ilisimatitsipput.
Taanna biilertut ingerlaleraangamik mianersoqqissaarnissaannik kaammattuivoq. Nalinginnaanngitsumik quasartorujussuuvoq, aamma erseqqarinnera annikillingaatsiaqqavoq.
Timmisartuussinissat tamarmik taamaatinneqartut
Bussinik angallassineq quasarnera pissutigalugu ullaap tungaani unitsinneqarpoq. Air Greenlandip tallimanngornermi ualikkut aallartussat tamaasa taamaatikkallarpai, silarlunnera pissutigalugu.