Nuuk
Nuummi akikitsumik akunnittarfeqalissaaq
Suleqatigiit Juhl aamma Tang mittarfiup tallineqarneratigut akunnittarfinnik amigaateqalertoqassasoq naatsorsuutigaat. Taamaattumik akunnittarfimmik pilersitsilerput marsip aallaqqaataani 2020-mi atoqqaarfissiorneqartussamik
Hotel Hans Egedep illuttaanik piginnittut, Polarbo A/S, akunnittarfimmik pilersitsisuulerput. Akunnittarfissaq 108-nik sinittarfeqassaaq.
- Akunnittarfiup pilersinneqarnissaa ukiuni sisamani takorluugaavoq. London Miningip Nuup eqqaani suliffissuaqalernissaanut atatillugu akunnittarfiliornissaq takorloorneqalerpoq. Tamanna piviusunngunngitsoormat pilersaarut uninngatinneqaqqaarallarsimavoq, Hotel Hans Egede A/S-imi siulersuisunut siulittaasoq Helge Tang, Polarbo A/S-mi aamma pisortaasoq, tusagassiutinut nalunaarummi allappoq.
Akunnittarfissaq akikitsuussasoq pilersaarutigineqarpoq, sanaartornerlu upernaap ingerlanerani aallartissaaq. Akunnittarfiulersussaq 2020-mi marsip aallaqqaataani atoqqaarfissiorneqassaaq.
Akunnittarfissaq Hans Egedep Oqaluffiata ungasinngisaani, iliveqarfiup eqqannguani, inissisimassaaq.
- Nuummi mittarfiup tallineqarnissaa uani aalajangiinermi qitiulluinnarpoq. Takornarialerinerup tungaatigut aningaasarsiornissaq naatsorsuutigineqarpoq, taamaattumik akunnittarfimmik pilersitsinissaq avaqqunneqarsinnaanngilaq, Helge Tang allappoq.
Akunnittarfik 108-nik ineeraqassaaq unnuinermut 799 koruuneqassalluni, Helge Tang ilisimatitsivoq.
Hotel Hans Egede aamma HHE Express ataatsimut 264-nik ineeraqalissapput.