Aalisarneq
Nuummi aalisakkerivittaaq ammaanersiorneqassaaq
Pingasunngorpat, Polar Raajat tunisassiorfittaassaat nutaaliaalluinnartoq Nuup umiarsualiviani ammassaaq
Polar Raajat A/S, Polar Seafood Gruppenimut atasoq, aalisakkerivik nutaaliaalluinnartoq aqagu pingasunngornermi ammassavaa.
Naalakkersuisut siulittaasuat Kim Kielseni, nalunaaqutaq pingasunut aalisakkerivimmik ammaassaaq.
Illorsuaq 1.500 m2-imik angissusilik, suliffeqarfiup ullumikkut raajaleriffiutaata saniani inissisimalissaaq, pingaarnertullu tunisassiarissallugit qalerallit, saarulliit saattuallu. Aallaqqaammut inuit 25-t sulisorineqassapput, siunissamilu aqutsisut sulisut minnerpaamik marloriaammik amerlineqarsinnaanerat anguneqarsinnaasoq naatsorsuutigaat.
- Ulloq unnuarlu nalunaaquttap akunnerni 24-ni tunitsivittut ammasartussaagatta, tunisassiorfittaami ulapaartoqarnissaa naatsorsuutigaarput, Polar Raajat pisortaanera Jan Weinreich ammaanersiunnginnermi, tusagassiuutinut nalunaarummi oqarpoq.
Aalisakkerivittaaq aalisakkerinermik inuussutissarsiornermik ineriartortitseqataajumaartoq, taassuma naatsorsuutigaa.
- Ataatsimut isigalugu naatsorsuutigaarput, Nuummi tunisassiorfittaaq aalisarnermik inuussutissarsiornermut pisariaqartinneqaqisumik eqeersaataassasoq. Nuummiinnaanngitsoq, Nunattali qeqqani tamarmi, Jan Weinreich oqarpoq.