Nuuk
Nuummi AA-t ataatsimiittarfii nutaat
Nuummi imerajuttut, AA-t, namminerisaminnik ataatsimiittarfittaarput. Taannalu maannamiit atorneqalereerluni.
Nuummi Avannamukaanut 1.
Anomyme Alkoholikerit, Imerajuttut ulluinnarni AA-mik taaneqartartoq, nammineq initaarnerat Kommuneqarfik Sermersuup tusagassiuutinut nalunaarutigaa.
Kommuneqarfik Sermersuup borgmesteriata, Asii Chemnitz Narupip AA-t initaarnerat nuannaarutigaa.
- Nalunngilarput inuppassuaqarmat imagassamik pinngitsuuisinnaannginnermik ajornartorsiuteqartunik tamatumalu kingunerikkajuppaa qaningisaminnik avatangiisiminnillu artorsartitsisarnerit aammattaaq nalunngilarput inuk imigassamik atornerluinerminik unitsitsiguni tamanna inummut namminermut ilaquttanullu qanoq iluaqutaatigisartoq, tassami imigassartorunnaarnermi inuuneq naleqarluartoq atugaalersarmat. Taamaattumik nuannaarutigaara Nuummi AA-t ikorfartoqatigiinnerminni ininik pitsaasunik atugassaqartinneqalerneri, borgmesteri Sermersuup nittartagaani oqarpoq.
Nammineq akilersorneqassaaq
Anonyme Alkoholikere angutinit arnanillu ataatsimooqatigiiffiuvoq misilittakkaminnik, nakuussitsiminnik neriuutiminnillu saqqummiussiffigisartagaat ajornartorsiorfitsik ataasiusoq qaangerumallugu aamma tamakku aqqutigalugit peqqissiteqqikkumallutik ikiuukkumasunit.
- Peqataanissamut piumasaqaatituaavoq, imerunnaarumalluni kissaatigisaqarneq. Akiliuteqartoqarneq ajorpoq. AA piumassutsimik akiliuteqarnikkut imminut napatippoq, Kommuneqarfik Sermersooq paasissutissiivoq.
AA upperisarsioqatigiinnut, upperutsinut, naalakkersuinikkut peqatigiiffinnut suliniaqatigiiffinnulluunniit qanoq ittuugaluanut qilersorsimanngilaq.
Anguniakkatta pingaarnersaraat aalakuunnginnissarput aamma imarajuttut allat aalakuunnginnissaannik anguniagaqarnerini ikiussallugit.