Unnuk kulturisiorfik

Nuuk ullumikkut nipilersornermik erinarsornermillu imaqangaatsiassaaq

Unnummi Kulturisiorfimmi nipilersukkanik nuannersunik tusarnaarsinnaavutit

Nipilersornermik Ilinniarfimmi nipilersuutit misilinneqarsinnaapput.

Unnummi Kulturisiorfimmi kikkut tamarmik aqqusinerni angallatissapput aliikkusersorniarlutik, pissanganartorsiorlutik, nuannisarlutik tamulugassarsiorlutillu. Aqqusinerni angallattorpassuarnit illarpalaarnerit nipillu nuannaarpaluttut tusarsaassapput.

Taamaattumik piffissap ilaani qarasaq qasuersaartittariaqarpoq, tamatumunngalu periarfissarissaassaaq.
Ukioq manna peqataasut arlallit nipilersortunik aliikkusersuisoqassapput.

Piginnaasallit TIU-kut tusarnaariakkit

Nipilersornikkut pisussat pingaarnerit ilaat Nuup Illoqarfiata Katersugaasiviani pissaaq. Tassani marluusaertut TIU erinarsukkanik asanninnilersaarutinik tusarnersunik aliikkusersuissapput. Marluusartut siorna nuusiaqqaartik saqqummersimmassuk Pernille Kreutzmannip erinaa immikkuullarissoq nunatsinnilu nipilersoriaaseq nutaaq nuannarineqaqaat.

– Apummik nakkariartortumik, ersamut tullunilu aattumik erinarsorpoq, Sermitsiaq.AG-mi naliliisoq taamanikkut allappoq.

Marluusartut erinarsugaat inuunermut kajungernartuupput nuannaarnartut, sukkasuut mitsimaallu. Pernille Kreutzmannilu kalaallisut erinarsorpoq.

– Ilisimanagu asanninneq maqaasisimallugu misigisimalluni, naapillugulu ilisimalerlugu tamanna uummatip pigigaa, taava tunniutiinnanngitsoortoqarsinnaanngilaq, Thora H. Nielsen TIU-kut nuusiaqqaavat netavisimi nalileramiuk allappoq.

Taamatut killitsisimanartiginngillatd Nivissat meeqqanut erinarsugaat qiimalluartut. Iluamik qiimmaallakkumagaanni. Taakkua ualikkut meeqqat atuakkanik atorniartarfianni meeqqanut erinarsuutitinik ilisimaneqarluartut atorlugit nutaartalerlugilu tusarnaartitsissapput.

Nammineq meeqqat erinarsuutaat ilisimanngikkaanni qularnanngilaq ilaqutariit mikinersaata illoqarfimmi
meeqqerivimmit nalunngikkai, pingaartumik Kumoorn Kumoorn ullormut aallarniutitut atorneqarluartarmat.

Meeqqat nuannarisaat

Nipilersornermik aliikkusersuisussat, mikinerpaat nuannarilluagaat, tassaapput marluusartut Hinnarik aamma Frederik K. Elsner, taakkulu illoqarfimmi sumiiffinni arlalinni aliikkusersuissapput. Nipilersullaqqissorsuit taakkua marluk peqatigiileramilli meeqqanullu nipilersuusiortalerlutik, nunami angalagaangamik sapiitsuliortutut nuannarineqartaqaat tipaatsutsitsisaqalutillu.
Erinarsugaat pingaartumik ilisimaneqarput Hinnariup assersuutigalugu qarlortaammik blokfløjtimik banjomillu qaqutigoortumik atuisarneranit, nipilersugaallu guitarimik nipaatsunnguaniit hip-hopimut assigiinngissuteqarput. Sumi qaqugulu tusarnaartitsinissaat programmimi takuneqarsinnaavoq, taannalu ataavartumik nutarterneqartassaaq kulturnatten.gl-imi.

Pisussanut pilersaarut misissoruk

Tassani takuneqarsinnaavoq aamma Nukissiorfinni, Ilinniarfissuarmi aammalu Royal Greenlandimi Air Greenlandimilu nipilersortunik aliikkusersuisoqassasoq, aviisilli naqiterneqalernerani paasissutissiissutigineqarsimanngilaq nipilersukkat qanoq ittut pineqarnersut.

Akerlianik Grønlandsbankimi unnuup ingerlanerani nipilersornernik qitinnernillu misigisassarpassuaqarpoq. René Løvstrømip nipilersornissaata saniatigut aningaaseriviup qitittartut tupinnaannartumik qitillaqqissut Texas Cowboy Dans Nuuk qaaqqusimavai. Arnat taakkua coorbut nipilersuutaannut tullereeqqissaarlutik avatersortarput, coorbut ilulliinik, kamippaannik nasaannillu ilisarnartunik atorlutik. Aliikkusersuineq isiginnaartunut qiimmannarluartoq.

Piginnaasalinnik ujarlerneq

Nipilersornermik Ilinniarfimmi nipaarsaarfiunavianngilaq, nipilersuutinilli nuannersumik misigisaqartoqarsinnaavoq. Ilinniarfimmi ilinniartitsisut ilinniarfiup nipilersuutai pissanganartut takutissavaat. Pulaartut allaat nipilersuutit misilissinnaavaat, tamakkualu tassaapput saxofon, noqartilik, cello, trompetit, guitari, qarlortaatit tumerparpaallu.

Suut tamarmik ajunngitsumik ingerlassappata pilersaarutaavoq unnuup naajartulernerani peqatigiissunik nipilersoqatigiissitsinissaq, inernissaali peqataasut piginnaasaat apeqqutaassagunarput. Pulaartut akornanni piginnaasaqarluartumik peqarpat nipilersornermik ilinniarfimmi ilinniartitsisut holdimi suli inissalinni peqataanissamut immersugassamik piareersimatitsissapput.

Unnuk kulturisiorfimmi suut sammineqarsinnaanersut Nuuk Ugeaviisimi atuakkit, aviisi akeqanngitsumik uani aaneqarsinnaavoq:

Powered by Labrador CMS