Nuuk TV-p siulittaasua uppisinneqartoq
Peter Frederik Lyberth Nuuk TV-mut siulittaasutut nutaatut qinigaavoq, siulittaasuusimasumit tallimanik amerlanernik taaneqarluni
Nuuk TV-mut ilaasortanit 4.000-it missaanniittunit ilaasortat taaseqataasinnaasut 81-it sisamanngornermi unnukkut ukiumoortumik ataatsimeersuartoqarneranut takkupput.
Akinik qaffaaneq kanalillu ataatsimoortukkuutaat allanngortinneqarnerat aallaavigalugit siulersuisuusimasut siorna 1,7 millioner koruuninik amigartooruteqartut sulinerat isornartorsiorneqarlunilu apeqqusersorneqarpoq.
Læs: Tidligere Nuuk TV-medlem: Det blev for dyrt
Nal. ak. sisamat sinnerlugit ataatsimeersuarneq tunngavigalugu Nuuk TV-p siulittaasua Orla Dalager siulittaasussarsiornermi unammillerteqalerpoq. Unammillertaa Peter Frederik Lyberth 40-nit taaneqarpoq, Orla Dalager 35-nit taaneqartoq. Taaseqataanngitsut arfiniliupput.
Ataatsimeersuarneq naammassimmat Peter Frederik Lyberth taamaalilluni siulittaasunngorpoq.
Orla Dalagerili siulersuisunut ilaasortaaginnarpoq, Jørgen Chemnitz aamma Nick Johansen, qinigaaqqittut, peqatigalugit qinigaagami. Ilaasortat sinneruttut pingasut ukioq manna qinigassanngortinngillat.
Siulersuisunngortut:
Peter Frederik Lyberth, siulittaasoq
Jørgen Chemnitz, ilaasortaq
Orla Dalager, ilaasortaq
Nick Johansen, ilaasortaq
Claus Nielsen, ilaasortaq
Hans Noahsen, ilaasortaq
Henrik Leth, ilaasortaq
Sinniisussat:
Sofia Rossen
Birgit Gedionsen
Erik H.K. Heilmann