venskabsbyer

Nuuk Tromsømut qanillattorusuppoq

Kommuneqarfik Sermersooq nunanut tamalaanut ammasuuniarpoq, tamatumunngalu tunngatillugu Norgemi illoqarfiit ilaat Tromsø illoqarfittut ikinngutitaarerusunneqarluni. Isumassarsiarlu Tromsømit nuannaarutigineqarpoq.

Aningaasaqarnermut Inuussutissarsiuteqarnermullu Ataatsimiititap sisamanngornermi Tromsømut suleqatigiinnermut isumaqatigiissusiornissamut siunnersuut isummerfigissavaa.

Issittup Paris-ia

- Tromsø nunani issittuni illoqarfiit pingaarnersaatut inissisimavoq, ilaatigullu issittup Paris-iatut oqaatiginiarneqartarluni, qanimut suleqatigiinnerulernissaamut illoqarfittullu ikinngutigilersinnaaneranut misissussallugu Nuummut soqutiginaateqarluni. Tromsø kultuurikkut inuiaqatigiinnut takornarianullu periarfissaqarluarpoq, soorlu issittoq pillugu misigisassarsiorfitsialassuaq Polaria, ilinniartoqarfittut illoqarfimmut uummaarissaalluaqisoq ilinniartut illuat taavalu Saamit kulturitigut takusassaqqissut pisartullu soqutiginartut pigineqarlutik, kommunaldirektøriungallartoq Lars Møller-Sørensen ataatsimiititamut saqqummiilluni allappoq.

Saamit Tromsømi najugallit soqutiginaataasa ilagaat aamma nunat inoqqaavisut nutaaliaassutsimut akulerusimasumik inuuneqarnerat, tamannalu Nuummut naleqquttuunera.

2013-mi kommuni Tromsømut isumaqatiginninniarsimangaluarpoq, oqaloqatigiinninnermillu aallartitsisoqarsimanani. Tamatuma kingorna Pinngortitaleriffitta Ilisimatusarfittalu norskit polarinstituttiat, immami misissuinermut instituttia aamma Tromsøp ilisimatusarfia suleqatigiilersimapput.

Tromsøp borgmesteria nuannaartoq

Kommunip isumassarsiaa Sermitsiaq.AG-mit Tromsøp borgmesterianut saqqummiunneqarsimavoq:

- Isumassarsiaq assut nuannarisorujussuuara, oqaaseqartartoq, Tromsøp borgmesteria, Kristin Røymo Sermitsiaq.AG-mut oqarpoq.

- Kommuneqarfik Sermersuumit pisortatigoortumik saaffigineqarnissara qilanaaraara, Kristin Røymo oqarpoq.

Massakkut illoqarfittut ikinngutigineqartut

Kommuneqarfik Sermersuup ukua illoqarfittut ikinngutigai:

  • Aalborg
  • Lyngby-Taarbæk
  • Herlev
  • Gentofte
  • Kopavogur, Island
  • Dalvik, Island

Tromsøp ukua illoqarfittut ikinngutigai:

  • Anchorage, USA
  • Arkhangelsk, Rusland
  • Gaza, Palæstina
  • Kemi, Finland
  • Luleå, Sverige
  • Murmansk, Rusland
  • Zagreb, Kroatien
  • Quetzaltenango, Guatemala
Powered by Labrador CMS