Nuuk tikeraartitsinermut sullissivimmik 120 millionit koruuninik nalilimmik peqalissaaq
Uuliaateqatigiiffiit, Royal Arctic Linep, suliffeqarfiit namminersortut, Namminersorlutik Oqartussat aamma Kommuneqarfik Sermersooq aningaasaliisoralugit Nuummi tikeraartitsinermut sullissivimmik takorluugaqarneq piviusunngortissavaa.
Aqqalu Jerimiassen, Inuussutissarsiornermut aamma Nukissiornermut naalakkersuisoq, tusagassiortunik katersortitsinermi Nunatta takornariaqarnermut periusissiaata, nutaanik isertitaqarfiulertunik pilersitsisussap sumut killinnera nassuiarpaa.
Nuummi tikeraartunut sullissivik piviusunngortinneqangajalersoq tassani saqqummiunneqarpoq. Sanarfinermut aningaasartuutit 120 millionit koruuniupput, aningaasalerneqarneralu inissingajalerpoq.
Aningaasalerneqarnera
Namminersorlutik Oqartussat 15 millionit koruunininik tapiissaaq, kommuni 8 millionit koruuninik, suliffeqarfiit namminersortut – ilaatigut uuliaatileqatigiiffiit – 40 millionit koruuninik tapiissapput, sinnerilu 57 millionit koruunit naligai, taakkulu Royal Arctic Linemit tunniunneqassapput, siulersuisut suliaq naammassillugu suliarereerpassuk, tamanna novembarimi pinissaa naatsorsuutigineqarpoq.
Nuummi umiarsualivimmi illut containereqarfiit pisariaqartinneqarunnaaput, taakku umiarsualivimmut nutaamut nuunnikuugamik. Tikaartitsinermut sullissivik taamaalilluni umiarsuit takornariartaatit taliffigisartagaata qanittuaniilissaaq.
Inuiaqatigiit iluanaarutissaat
Takornariartitsineq siorna inuiaqatigiit aningaasaqarnerannut takornariat aningaasat nassataat aqqutigalugit 340 millionit koruuninik kaaviiaartitsisimasoq, Aqqalu Jerimiassen ilisimatitsivoq. Nunanit allanit takornariaqarneq suliffinnik 620-inik toqqaannartumik imaluunnit suliaqarnermut tunngasunik sunniutaanik pilersitsissasoq naatsorsorneqarsimavoq.
Sapaatip-akunnerata tulliani Nunarput takornariaqarnermik saqqummersitsinerni angisuuni Kinami illoqarfinni Beijingimi aamma Guangzhoumi nittarsaanneqassaaq.
- Nukissiorneq pillugu isumasioaqatigiinnermut atatillugu Kinamiittussaanera iluatsillugu, taakkunani takornariaqarnermut aaqqissuussanut peqataalluni Nunarput oqaluuserisassanut ilanngunneqarnissaa pissusissamisoorpoq, Aqqalu Jerimiassen, Visit Greenlandimi aamma Air Greenlandimit ingiaqateqartussaq ilisimatitsivoq.
Takornariaqarnermut periusissaq aasaanerani 2019-imi saqqummiutissangatinneqarpoq.
NutaarsiassatDMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...
Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...