soraarsitsineq
Nuuk soraarsitsiortornermi eqqorneqarnerpaavoq
Kommuneqarfik Sermersuup sulisut 47-t ukioq 2015-imi sipaarniarnermi kingorna suliunnaarsilerpai. Illoqqortoormiut eqqorneqanngitsoq Nuummi sulisut 30-t tungaanut suliunnaarsinneqassapput
Kommuneqarfik Sermersuup aappaagumut aningaasanut missingersuutissaminut sipaarniarnerata kinguneranik sulisut 47-t ulluni kingullerni kalerriortorneqarput kommuunip pilersaarutigigaa soraarsinneqarnissaat.
Kommuunip paasissutissiinera najoqqutaralugu sulisut suliunnaarsinneqartussat atorfinitsinneqarnerminni isumaqatigiissutertik malillugu soraarnissamut piffissaq aalajangiussaareersoq najoqqutaralugu suliunnaarsinneqassapput.
Atuaruk: Kommuneqarfik Sermersuumi 47-t soraarsinneqartut
Allaffeqarfiarannguaq soraarsitsiortornermi eqqorneqanngilaq
Kommuunip illoqarfiini pingasuni allani, tassa Paamiuni, Tasiilami aamma Nuummi soraarsitsiortortoqartoq kommuunip allaffissornikkut sulisukinnersaani, Illoqqortoormiuni, sulisunik ikilisaasoqassanngilaq.
- Sulisut qulit missaat Paamiuni Tasiilamilu suliunnaarsinneqassapput, suliunnaartussanilu 47-ini sinneruttut Nuummi soraarsinneqassapput, Kommuneqarfik Sermersuumi pisortaaneq, Steffen Ulrich-Lynge, Sermitsiaq.AG-mut oqarpoq.
Steffen Ulrich-Lyngep ilanngullugu ilisimatitsissutigaa sulisunit 47-nit suliunnaartussanit 28-t SIK’mi ilaasortaasut, sinnerilu kattuffinni ukunani ilaasortaasut: AK, ASG, AC, DJØF, Imak, Sundhedsforbundet, NPK aamma SSK.
Atuaruk: Kommuneqarfik Sermersooq mianersortumik missingersuusiorniarpoq
Atuaruk: Sermersuumi sulisut 75-it soraarsinneqarput
Suli soraarsitsiortoqqittoqarsinnaanera ilimanarsinnaasoq
Sulisut 47-t soraarsinneqarneratigut Kommuneqarfik Sermersooq 20 aamma 25 million koruunit akornanni 2015-imi sipaaruteqassaaq. Kisianni kommuuni aamma suli 30 million koruuninik sipaarfigisassaminik nassaarniartussaavoq ukioq 2015 aningaasaqarnermigut toqqissisimanartumik inississaguni.
Maannamulli suli nalunarpoq kommuuni sulisuminik soraarsitsiortoqqissanersoq.
- Allattoqarfik 30 million koruuninik sipaarniuteqarfiusinnaasunik nalunaarsuinikuuvoq. Taanna kommunalbestyrelsip ukioq 2015-imut missingersuut marlunngornermi oktobarip 27-ani eqqartuleruniuk qimerluussavaa. Missingersuusiornerlu novembarip naalernerani aappassaaneerneqarluni naggataarneqassaaq, Steffen Ulrich-Lynge Sermitsiaq.AG-mut taama oqarpoq.
Atuaruk: Naligiissaarinermik aaqqissuussinissaq unitsinneqarallarpoq