Nuuk: Sapaatip akunnerata qaangiuttumi politiit suliaat takukkit

Nuummi Politiit sapaatip akunnera qaangiuttumi sulerisimanerlutik tusagassiutinut nalunaarutaat:

Ataasinngorneq martsip pingajuat:

'Nuussuut Atuarfiata ikuallattoqarneranut kalerrisaarutaa aallartippoq. Politiit atuarfimmut ornigunnerminni paasivaat piaaraluni kalerrisaat aallartinneqarsimasoq, tassani ikittartoq atorneqarsimasoq paasineqarmat.

Arnaq utoqqaliarsaatoq politiinut sianerpoq nalunaarutigalugulu najugaqarfimini Nuussuarmi Paarnani najukkami qulaani ikuallattoqartoq. Qatserisartut aggersarneqarput. Politiip nulialu ikuallattoqartoq paasigamikku ornigutipallapput najugaqartullu anisillugit. Najugaqarfik ikuallatsinneqarsimasoq politiit pasivaat, najugaqarfimmi najugalik ikuallatitsisimasutut unnerluutigineqarpoq.

Pingasunngorneq martsip tallimaat:

Kræftimut akiuiniarnermut katersinermi februaarip 27-ani ingerlanneqartumi aningaasanik nakkaatitsivimmmik tillinniartoqarneranik Brugsenimit nalunaarutiginnittoqarpoq. Tillinniartoq sulisunit tigusarineqarsimasoq politiit takkummata tigusaraat.

Sisamanngorneq martsip arferngat:

Paasiniaanermi angut 35-nik ukiulik qummoroortartunik allap angutip tillitaanik pisisimalluni nassuerpoq, naak nalunngikkaluarlugu tillitaasut pisiffigisimallugu. Qummoroortartut decembarip 30-ani tillitaapput Jysk / Pisiffimmi. Pisiffiup qummoroortartut tillinneqarsimasut sinneri tigoqqippaat.

Sapaatip akunnerata ingerlanerani 23-riarluni angerlarsimaffinnut eqqissisaajartortoqarpoq, taakkunanilu pingasut meerartaqarlutik' politiit tusagassiutinut nalunaarumminni allapput.

• 18 angallannermut inatsisinik unioqqutitsinerit, tassani mobilertut, aappaluttukkut ingerlasut kiisalu aalakoorlutik biilertut pingasut

• Ikiaroornartumik tunngasut arfineq-marluk

• Pisiniarfinni tillinniartut arfineq-pingasut

• Tillinniarnerit sisamat

• Angerlarsimaffinnut tillinniarnerit pingasut

• Aalakoorpallaartut pingasut

• Nakuusernerit marluk

• Unioqqutitsilluni kalerrisaarineq ataaseq

• Ikuallaanermut tunngasoq ataaseq

• Toqutsinissamik siorasaarineq ataaseq

• Suliffimmut tunngasoq ataaseq

• Atorfilinnut sulialinnut nakuusernerit marluk

• Immiaaqqanik tuniniaasoq ataaseq

• Biilinut aserorterineq ataaseq

• Angerlarsimaffinnut eqqissisaajartornerit 20-t

• Angerlarsimaffinni eqqissisaanermi meerartallit pingasut