Nuuk: Qamutilittartoqareerpat annaassiniarnermi sungiusartoqassaaq

Ataqqinartorsuup dronning Margrethep sisamanngorpat apriilip 16-ani 75-nik ukioqalernerani atatillugu pisarnertut Nuutoqqami malunnartitsisoqassaaq.

Qamutilittartut saniatigut ataatsimut erinarsoqatigiittoqassaaq Borgmesterilu oqalugiareerpat ukioq mannattaaq Ataqqinartorsuaq Dronning Margrethe II-aat nalliuttorsiutigalugu Hinnarik aamma Frederik Elsnerikkut meeqqanut erinarsuummik appissapput aammalu Kammak Bamsen takkutissalluni.

Inuuissiortoorneq naggaserlugu Issittumi Sakkutooqarfimmit Air Greenlandimit Politiiniillu peqataaffigineqartumik annaassiniarlutik sungiusassapput. Sungiusarneq Nuutoqqamiit malinnaavigineqarsinnaavoq.

- Neriuutigaara tamatta Dronningitta inuuissiorneranut atatillugu nalliuttorsiornissarput innuttaasut meeqqat inersimasullu najuuffigilluarumaaraat, Kommuneqarfik Sermersuumi borgmesteri Asii Chemnitz Narup, Inuit Ataqatigiit, tusagassiutinut nalunaarummi oqarpoq.

Nuutoqqami pilersaarut nalunaaqutaq 11.55-mit aallartittoq:

Tikilluaqqusineq

• Nuutoqqami qamutilittarneq
• Erinarsoqatigiinneq: Nunarput Utoqqarsuanngoravit
• Borgmester Asii Chemnitz Narup-ip oqalugiarnera
• Ataatsimut inuuissiortooqatigiinneq: Ullumi Dronning nalliuppoq
• Hinnarik aamma Frederik Elsner meeqqat erinarsuutaannik appissapput
• Kammak Bamsen ilassiartorluni takkutissaaq
• Politiit, Arktisk Kommando-llu annaassiniarnermik sungiusarnerat Air Greenland A/S-imit peqataaffigineqartoq.

Dronningip apriilip 16-ani 75-iliineranut atatillugu AG dronning pillugu sammisaqassaaq. Aviisi apriilip 15-ani saqqummissaaq akeqanngitsumillu pdf-ikkut aaneqarsinnaassalluni