aalajangerniaruusaarneq

Nuuk Imermi pisortaq inatsisip aalajangerniaruusaarnera pillugu: Akuerisassaanngilluinnartoq

Naalakkersuisut poortuutinut inatsit pillugu qanoq pisoqarnissaanik aalajangerniaruusaarnerat, Bernhard Christensenip, maqiterivimmi Nuuk Imermi pisortap akuersaarneqarsinnaanngilluinnarnerarpaa. Aalajangerneq Nuuk Imiup siunissaanik aalajangiisussaq.

Direktør for Nuuk Imeq, Bernhard Christensen, er langt fra tilfreds med Naalakkersuisuts håndtering af en ny emballagelovgivning.

Maqiterivimmi Nuuk Imermi pisortap, Bernhard Christensenip, Naalakkersuisut naammagitaalliutigai.

Naalakkersuisut poortuutinut inatsit ammanerulersissanerlugu qangali aalajangiiffigisussaagaluarnerat tamatumunnga tunngaviuvoq.

Marsimi aalajangiisoqassasiq
Poortuutinut inatsimmut nutaamut tunngatillugu qaqugu aalajangiisoqarnissaa pisortap naatsorsuutigineranut aperineqartilluni ima akivoq:

- Marsimi aalajangiisoqarnissaa naatsorsuutigaara.

Aappaagu marsimi?

- Naagga, marsimi ukiormanna.

Kisiannimi marsi qaangiutereerpoq?

- Aap ilumoorputit, Namminersorlutik Oqartussat suleqatigalugit tassa taamaappoq. Siullermik marsimi aalajangiisoqartussaagaluarpoq, taava apriilimi aalajangiisoqarumaartoq nalunaarutigineqarpoq, taava aamma maajimut kinguartinneqarpoq. Maannalu juunimiippugut, taava juunimi aalajangiisoqarniarsimassaaq. Taamatullu oqarfigiteqattaarneq naammaginanngitsorujussuuvoq, Bernhard Christensen oqarpoq.

- Akuersaaruminaatsorujussuuvoq.

Aamma atuaruk: Kuupik Kleist: Politikkikkut erseqqissaatitsineq pingaarnertut suliassaraara

Annikilliortitaasut
Poortuutinut inatsisip nutaap Nuuk Imermut iluaqutaasussanngorlugu aalajangiiffigineqarnissaa pisariaqartinneqarpoq. Taamaanngippat siunissami imeruersaatit qillertuusamiittut nunatsinnut eqqunneqarsinnaanngussapput. Nuuk Imerlu matusariaqalissaaq, Nuummilu suliffiit 40-nit amerlanerusut annaaneqassapput.

- Aalajangiisinnaannginnerminni kikkut tamaasa annikilliortillugit inissisimalersippaat. Politikkikkut imaluunniit attuerusunnginnermik aasaaneraniluunniit sulinngiffeqarnermik pissuteqarnersoq naluara.

- Politikerinik oqaloqateqarniarsarivugut, kisianni uani suliami ajornakusoortorujussuuvoq. Suliffeqarfiillu 40-nit amerlanerusut atorunnaarsissallugit politikerimut aamma suliaq nuanninngitsuuvoq, Bernhard Christensen oqarpoq.

Kuupik Kleist siulittaasunngortoq
Naalakkersuisut siulittaasorisimasaat Kuupik Kleist Nuuk Imermi siulittaasunngortoq ullumi nalunaarutigineqarpoq. Pisortaq tamatumunnga ima oqaasissaqarpoq:

- Kommuneqarfik Sermersooq piginneqataassuteqartutut matuserusunnani nalunaaruteqarnikoq nalunngilara. Suliffiit attatiinnarniarsarinissaat kissaatigaat. Kuupik Kleistip toqqarneqarneratigut suliamut tassunga ilungersuuteqarnissaanut upperinnissimasut taamaappat ilimagaara, Bernhard Christensen oqarpoq.

Powered by Labrador CMS