Miljøbilen
Nuuk eqqagassanik ulikkaarpoq
Biili eqqagassanik aallertartoq innuttaasut angerlarsimaffiinit atortukunik elektroniskinik toqqortariinnarneqartunik iluatsitsilluaqaluni katersivoq
Nuummi eqqagassanik avatangiisinut ulorianaatilinnik katersineq maanna ingerlanneqarpoq, ilaatigut atortukut elektroniskiusut katersorneqarlutik. Biili eqqagassanik avatangiisinut ulorianaatilinnik katersilluni angalaaqqaarami eqqagassat avatangiisinut ulorianaatillit 120 kiilut usiliuppai.
Qarasaasiamik, fjernsynimik imaluunniit batterimik aseqqukumik uninngasuuteqarpit? Taava biili eqqagassanik avatangiisinut ulorianaatilinnik aallertartup siarngisa sapaatit tamaasa kassuppalunnerat tusaaniariuk, taannami manna tikillugu iluatsilluaqaaq.
Kommuneqarfik Sermersuup biilitaava taanna sapaammi juulip arfineq-aappat 2013 siullermeerluni angalaarpoq sapaammi tulliuttumi aamma angalaarluni.
- Naatsorsuutigisamit pitsaanerujussuarmik angusaqarpugut. Taamak eqqagassaqartiginera naatsorsuutiginngikkaluarpara. Inuit aqquserngit sinaanni utaqqilluta uninngapput. Assut nuannaajallannarpoq, eqqagassalerinermik ingerlatsisut pisortaat Henrik Molbech oqarpoq. Biili eqqakkanik avatangiisinut ulorianaatilinnik katersisartup angalaaqqaarnermini sumiiffinni sisamani igitassat 120 kiilut katersorpai.
Nuummi susoqarnersoq Nuuk Ugeavisimi oqaluttuanik amerlanernik atuarsinnaavutit. Aviisi akeqanngitsumik uani pisiariguk: