silarluk
Nuuk: Bussit aqqummi ataatsimi taamaallaat ingerlaarput
Nuummi bussit arlallit uninngagallarput aqquserngit quasappallaarmata anoraasuanerillu sakkortoqimmata
Nuup Bussii marlunngornermi ullaap tungaa linie 2-mi Nuup Nuussuullu akornanni ingerlaarput. Bussit ingerlaarfiini allani uninngagallarput aqquserngit quasappallaarmat anoraasuanerillu sakkortullutik.
Qinngutsinnut, mittarfimmut atuartullu bussiat marlunngornermi ullaap tungaa uninngapput. Meeqqat atuartut akeqanngitsumik linie 2-mut ilaasinnaapput.
- Aqquserngit silallu qanoq innerat malinnaaffigiuarparput. Ingerlaarfiit allat ingerlaffigeqqilerumaarpagut tamanna sillimaniarnikkut illersorneqarsinnaasoq nalilerutsigu, Nuup Bussiini pisortaq Michael Briefer Sermitsiaq.AG-mut oqarpoq.
Marlunngornermi ullaap tungaa bussit ingerlaarnerat kinguaattoorfiusassaaq. Nuup Bussiisa atuisutik kajumissaarpaat sms-ikkut nalunaarfigitittarnermut ilanngutequllugit tassuuna bussit ingerlaarfii pillugit ilisimatinneqartarsinnaagamik.
Nuup Bussiisa aamma nittartagartik facebookimilu quppernertik nutartertuarpaat.