Nuuk aamma Iqaluit akornanni 2015-mi silaannakkut angallassisoqassanngilaq

Air Greenlandip Nuuk aamma Iqaluit akornanni angallassinini 2012-mi aallarteqqippaa. Angallassinerillu soqutigineqarpallaannginneri pissutaallutik pilersaarutit unitsiinnarneqarput 2015-mi.

Takornarialerinikkut, aatsitassarsiornikkut kiisalu suliffiit akornanni angalanikkut naatsorsuutigineqartumit ikinnerunerat pissutaalluni angallassinissat unitsiinnarneqartut Air Greenlandimit Christian Keldsen ilisimatitsivoq.

- Angalanissamut periarfissiissutip ammaqqinneranit maannamut ineriartornera naatsorsuutigineqartumik ingerlanngilaq. Aningaasaqarnerput aamma eqqarsaatigalugu angallassinissat unitsiinnarneqarput, Christian Keldsen oqarpoq.

Kalaallit Nunaanni Nunavumilu aqutsisunit aningaasaliisoqanngippat angallassinerit ingerlatiinnarneqarsinnaanngitsut Christian Keldsen ukioq kingulleq nalunaaruteqarpoq. Tamannalu pisimannginnera pissutaalluni angallassinissat unitsiinnarneqarput.

Taamaakkaluartoq Air Greenlandip sumiiffinni taakkunani angallassinissamut suli pisinnaatitaaffeqarpoq, taamaattumillu aappaagu periarfissiissutip ammaqqinneqarnissaa misissorneqassaaq.

Nuummit Iqalunnut angalaniaraanni ullut pingasut atorneqartariaqalissapput.

Timmisartuussinernut attartortut Air Greenlandimit suli ingerlanneqartassapput.