nalornineq
Nuugaatsiarmiut ukioq manna angerlarsinnaanngitsut
Qimangutsinneqarsimasut qaammatini tulliuttuni sumi najugaqassanersut kommunimit sulissutigineqaleruttorpoq.
Nuugaatsiap siunissaa suli nalornissutigineqarpoq. Innuutaasut qaqugu utissanersut utissanersulluunniit paasiniarlugu sulissutigineqaleruttorpoq.
Qularnanngilarli ukiup affaa sinnerlugu ingerlareerpat aatsaat paasisaqarnissaq. Qaasuitsup Kommunia taama naliliivoq.
- Taakku ukioq manna angerlarsinnaanerat naatsorsuutiginngilarput, Qaasuisup Kommuniani isumaginninnermut pisortaaneq Henrik Sóloy oqarpoq.
Nuugaatsiamit qimangutsinneqarsimasut massakkut Uummannamiikkallarput, sivisuumilli aaqqiissutaasinnaasumik ujaasisoqarleruttorpoq.
- Sumi najugaqarsinnaanerat paasiasssavarput. Taakku sumut nuukkusussinnaanerannik oqaloqatigissavagut, assersuutigalugu piffinni ilaqutaqarnersut najugaqarfigisinnaasaannik, tassani utaqqiisaasumik angerlasimaffigisinnaasaannik ikiuutissalluta, Henrik Sóloy nassuiaavoq.
Taassuma oqaluttuaraa, taakku sakkortuumik misgisaqarsimanertik tupinnanngitsumik suli sunnertisimaffigingaat.
- Aaqqissutitut nerisaqartitsinermik unnuiffissaqarnerulli saniatigut psykologiimut tunngasunik neqerooruteqarfigaangut.
- Aammattaaq inuit ikioqatigiillaqqissorujussuullutik. Taakku arlaleriarlutik oqaloqatigeeqattaartarput Uummannamilu innuttaasut assorujussuaq ikiuulluarlutik, isumaginnittoqarfimmi pisortaaneq oqarpoq.
Malissuaqarnerata kingorna kommunip isumaginnittoqarfia Uummannami Aasiannilu qimangutsinneqartunut tigusilluarsimaqaat
- Sulisugut ulloq unnuarlu sulisimapput, pitsaalluinnartumillu iliuuseqarsimallutik, Henrik Sóloy oqarpoq.