ajunaarnersuaq
Nuugaatsiami pisiniarfik ajoqusingaatsiarsimavoq
Nuugaatsiami Pilersuisup pisiniarfia arfininngornermi unnukkut tassaarsuarmik sakkortuumik eqqorneqarpoq.
Pisiniarfiuteqarfik KNI sapaatip ullaassaani nal. 01:50 Nuugaatsiaq Illorsuillu tassaarsuarmik eqqorneqarsimasut paasitinneqarpoq.
- Paasissutissinneqaannarluni KNI upalungaarsimaniarneq pillugu Sisimiuni KNI-p kiffartuussiviani pingaartunik pilersitsisoqarpoq, ilaatigut tassaarsuaqarnera sutigut eqquisimanersoq paasiumallugu. Avannaani niuertut attaveqarfigiortorneqarput ajunnginnersut paasiniarlugu, aammalu najugaanni tassaarsuaqarsimanersoq paasiumallugu, KNI-mi pisortaaneq, Peter Grønvold Samuelsen suliffeqarfiup nittartagaani allappoq.
Nuugaatsiami niuertup KNI-mut ilisimatitsissutigisinnaasimavaa:
- Nioqqutissanut qerisunut qerititsivipput aserorsimavoq, iigai matualu aserorsimallutik, qerititsivillu imarmik immerneqarsimalluni.
- Pisiniarfik napagaluarpoq, kisianni aseruatitersimavoq tassaarsuarmillu immamik immerneqarsimalluni, igalaavilu aseruatitersimallutik.
- Ikummatissaasivik ajorunanngilaq, ersittumillu ikummatissamik seerisoqarpasinngilaq.
- Niuertup illua tassaarfigitissimavoq, igalaat aseruatitersimallutik imarmillu immerneqarsimalluni.
Niuertup ungasianiit isiminit takusai taamaapput, Uummannamut qimarnunneqanngitsiarnermini takusimasamisut oqaluttuai najoqqutaralugit, KNI ilisimatitsivoq.
- Uummannami qatserisartunit paasitinneqarpugut nunaqarfimmi ikummatissaasivimmiit ersittumik ikummatissamik seerisoqanngitsoq, Peter Grønvold Samuelsen oqarpoq.
Innaallagissiorfik aserorsimasoq aamma tusarneqarpoq, nunaqarfimmilu sarfaqanngitsoq.
- Nioqqutissanik illoqarfinniit nunaqarfinniillu qanittuniittunik assartuisoqarsinnaanera Royal Arctic Linemut saaffginnissutigisimavarput, ilaatigut pisariaqassappat umiarsuit ingerlaneri allanngortinneqarsinnaaneri nunaqarfimmilu inuussutissanik pilersuisoqaqqissinnaalerasuarnissaa qularnaarneqaqqullugu.
- Maannakkuugallartoq suli paasissutissiissutigineqanngilaq nunaqarfik qaqugu innoqqissinnaanersoq, pisortalli nunaqarfik ammaateqqeriarpassuk pinasuartumik qanoq iliuuseqarnissarput piareersarparput, Peter Grønvold Samuelsen oqarpoq.