Nuugaatsiami inuit sisamat toqusimanissaat aarlerigineqarpoq

Nuugaatsiami tassaarsuup nunaqarfik eqqornerata kingorna inuit sisamat toqusimanissaat aarlerigineqarpoq.

Inuit taakku sisamat illup qaarussaasup nusutsittullu iluaniissimapput.

Inuit 23-t nunaqarfimmeersut suli sumiissusersineqanngillat, kisianni taakku allami qularnanngitsumi imaluunniit feeriarlutik aallaqqasimasinnaasut, politiit ilisimatitsissutigaat. Taakku sumiiffimmi ulorianartorsiorfiunngitsumiissimaguni politiit eqqugaasunut oqarasuaataannut attaveqarnissaannut kaammattorneqarput, uunga normumut: + 299 36 52 49.

Innuttaasut 78-t sinneruttut maanna qimagussorneqareerput, maannalu Uummannamiillutik.

- Pisoq imaannaanngitsorujussuartut isigaarput, politimesteri Bjørn Tegner Bay tusagassiortunik katersortitsinermi oqarpoq.

Nuugaatsiami illut aqqanillit aserorsimapput - arlaqartullu imaanut nusutsillutik kuugussaasimapput.

Nunaqarfimmi sarfaqanngilaq, innaallagissiorfik illut taakku eqqugaasut ilagimmassuk.

Nunaqarfimmi innuttaasunut tamanut misigisaq sakkortusimasoq Bjørn Tegner Bay ilisimatitsivoq, aammalu tarnip pissusaanik ilisimasalimmik ikiuiartortoqalersoq.

Nuugaatsiaq maanna inoqanngilaq, kisianni politiinit nakkutilliivigineqarpoq.

Tamatuma saniatigut innuttaasut namminneq ujaasiniartut utaqqeqqaarnisasaannik politiit qinnuigaat. Tamatumunnga taarsiullugu tusagassiorfinnut malinnaaqqusipput, politiillu kajumissaarutaannut tusarnaaqquneqarlutik.

Tassaarsuaq nunap sajunneranit pilersinneqartoq, politiit maanna uppernarsarpaat. GEUS-ip nunap sajunneranit pilersinneqarsimasinnaanera nalilernikuuaa.

Uummannami kalerrisaarut taamaatinneqarpoq, kisianni innuttaasut kalerrissaarummut naalaarnissaannik kajumissaarneqarput, sajuttoqaqqissagaluarpat taanna kalerrisaarissaaq.