havn
Nutsernissarsuaq qanillisoq
Royal Arctic Line Qeqertanut 46-mi quersuarmi assartugalerivimmilu nutaami inissikkiartuaalerpoq. Taama pisoqaleruttornerani umiarsualivitoqqami aalisarneq takornariaqarnerlu pingaarnerutillugit ineriartortitsinissamut pilersaarutit ingerlanneqalerput
Royal Arctic Linep assartugalerinermi sulisuisa ilaat ataasinngormat nutserput, tamatumani Qeqertanut 46-mi quersuartaaq assartugalerivillu iserterfigineqarlutik. Maannamut nassiussanik, containerinik mikisunik isaarissamilu containerinik tunniussisarneq avatangiisini nutaani ingerlanneqalerpoq, kisiannili nassiussiartornerit nassiussanillu tunniussinerit tamarmik sapaatip-akunnerata ataatsip missaata ingerlanerani Qeqertani aamma isumagineqalissallutik.
Nutsernissarsuup pinnginnerani sulisut aaqqitassanik kingullernik maanna suliaqarput. Royal Arctic Linep umiarsualivitoqqami illuutit pingasut suli pigisarai. Aqutsisut sulisoqarnermullu tunngasuni atuuffiit ilaat Aqqusinersuaq 52-imi aamma allaffimmi inissisimaannassapput.
– Najukkatsinni nutaami suut kikkullu takkussuunnerat anisarnerallu aqunneqarnerujussuussaaq. Assartugalerivik susassaqanngitsunut matoqqassaaq, sulineq annerpaamik naammassisaqarfiulersissinniaratsigu isumannaallisaanerlu annertusarniaratsigu. Tamatumunnga atatillugu assartugalerivimmi sulisut sukkut pisuinnarmik ingerlasinnaanerat eqqoqqissaartumik qalipaleruttorparput, Royal Arctic Linemi sillimmasiisarnermut pisortaq, Henning Jollmann, oqarpoq.
Ilaasut tikittarfiat aallartarfiallu cafélik
Royal Arctic Linep sapaatip-akunnerata ataatsip missaa qaangiuppat containerit nussulerpagit umiarsualivitoqqami ineriartortitsinissamut periarfissat ammaanneqassapput.
– Umiarsualivitoqqami aalisarneq umiarsuarnillu takornariaqarneq siunissami pingaarnerutillugit aallunneqassapput, sumiiffimmilu nutaami containerersorneq nassiussanillu pilersuineq aallunneqassallutik. Royal Arctic Linep sumiiffimmit nuunneratigut ingerlatsisut nutaat nutsersinnaalernissamut ingerlatsisullu pioreersut annertusaanissamut inissaqartinneqalissapput, Sikuki Nuuk Harbourip pisortaa, John Rasmussen, oqarpoq.
Umiarsualivimmut pilersaarutit pillugit Sermitsiaq aviisimi atuarnerugit, aviisi digitaliusoq uani pisiarisinnaavat: