Nutaarsiassatsialak: Kangerlussuarmit timmisartuussinerit amerlanerusut
Radiokkut attaveqaat Islandimeersoq utaqqiisaasumik ikkussorneqareerpoq, taamaattumik amerlanerusunik timmisartuussisoqarsinnaalerpoq.
Kangerlussuarmi radiokkut atortorissaarutit pingasunngormalli timmisartuussinikkut ajornartorsiortitsipput, tassami timmisartuussinerit arlaqartut taamaatiinnartinneqanngikkunik kinguartinneqarput.
Kangerlussuarmi akunnermut mittut tingisulluunniit marluinnaajunnaarlutik sisamanngortinneqartut Mittarfeqarfiit tusagassiutinut nalunaaruteqarput.
- Mittarfeqqarfinni killilersuinerup sinnerata atorunnaarsinnissaa sulissutigaarput Mittarfik Kangerlussuarmi timmisartuussineq pissusissamisooqqilerniassammat, Mittarfeqarfinni ingerlatsinermut pisortaq Niels Grosen tusagassiutinut nalunaarummi oqarpoq.
Radiokkut attaveqaat Islandimeersoq utaqqiisaasumik ikkussorneqareerpoq, teknikkikkullu akuersissut kingulleq anguniarneqarpoq killilersuineq atorunnaarsinniarlugu, ilisimatitsissutigineqarpoq.
Timmisartuussinerit
Taamaattumik Air Greenland amerlanerusunik timmisartuussisinnaanngorpoq.
- Mittarfeqarfinnit nalunaarutigineqarpoq Kangerlussuarmi akunnermut sisamariaq aallartitsisoqanngikkuni mitsitsisoqarsinnaasoq, tamannalu timmisartuussinitsinnut iluaqutaavoq. Aqagumit, marlunngorpamit nalinginnaasumik timmisartuussisoqalissaaq, aamma aqagu sumiiffinni amerlanerpaani atoruminassaaq, Air Greenlandip attaveqaqatigiinnermut pisortaa Katrine Hjelholt Nathanielsen Sermitsiaq.AG-mut oqarpoq.