aatsitassat
Nutaarsiassatsialak aatsitassarsiornermut tunngasoq
Aatsitassarsioqatigiiffinnut ujaqqanik aserorteraluni misissugassanngortitsisarfik laboratoria aallutaqartoq qaammatip tulliani pilersinneqassaaq.
Aatsitassarsiortoqarneruleriartornissaanut neriuuteqartoqarnera pissutigalugu, Greenland Venture aamma Martin Sandy Shalmi ataatsimoorlutik laboratoriamik pilersitsiniarput.
Timmisartukkut nassiussinermi aningaasarpassuit sipaarneqassasut
- Ujaqqanik misiliut nalinginnaasumik 2,5-5,0 kiilunik oqimaassuseqartarpoq. Ujarak misissoqqissaarneqarnissaminut piareersimasoq 100-250g oqimaassuserisarlugu. Ujaqqat misissorneqartussat Kalaallit Nunaanni piareersarneqarnerisigut pisisartut aamma timmisartukkut angallassinermut aningaasarpassuarnik sipaaruteqarsinnaapput, Martin Sandy Shalmi tusagassiuutinut nalunaarummi ilisimatitsivoq.
GeoLAB Greenland ApS geokemiske analyseæaboratoriamut MS Analyticalimut ukiuni pingasuni atuuttussami isumaqatigiissuteqarpoq, taanna GeoLAB Greenland ApS-imi piareersarneqarsimasunik misiliutinut geokemiskinik misissueqqissaartassaaq.
GeoLAB Greenland ApS-ip atorneqarneratigut aamma ingerlatseqatigiiffiit ujaasinermik suliaqartut misissuinermit inernerit sukkasuumik pissarsiarisinnaassavaat, taamaaliornikkullu ujaasineq pitsanngorsarlugu, kiisalu ataavartumik niuerfimmut nalunaaruteqartarlutik.
Pisisartoq siulleq inissereerpoq
North American Nickel Inc.-ip qillerillutik misiliutigisaat tamaasa GeoLAB Greenland ApS-ip suliarinissaannut isumaqatigiissusiorpoq.
- Laboratoriamik aserorterivimmik aallartitsinissamut piffissaq eqqortuuvoq. Niuerneq mumikkiartulerpoq, uagullu Kalaallit Nunaanni maanna ataatsimoorluta aatsitassarsiorneq tapersorsortariaqalerparput, aallarniisoq Martin Sandy Shalmi oqarpoq, nangillunilu:
Akiliisinnaajunnaarfiusumit aallartittut
Per Buhl Olsen, Greenland Venture A/S-imi Invest Manager aamma GeoLAB Greenland ApS-imi siulersuisunut siulittaasoq:
- NunaMineralsimi akiliisinnaajunnaarnermi pigisat pujoralatsertut ingerlateqqitassanngortipagut, taakku aatsitassarsiorfimmik tapersiisuupput, tamannalu naammagisimaartorujussuuaarput, ingerlatseqatigiiffiullu aatsitassarsiorfiup aallartikkiartornera ilutigalugu pitsaasumik niuerfinngornissaanut ineriartornissaanut qilanaarpugut.
Marlunnik sulisussarsiortut
Misiliummik sulianik akisussaasussanik sulisunik marlunnik GeoLAB Greenland ApS ujaasillutik ilisimatitsivoq.