Akileraarut
Nutaanik akileraarutitigut ilanngaateqalersitsoqarsinnaavoq
Innuttaasunut sulisunut akileraartartunut atuuttunut, akileraarutitigut ilanngaatissanik Naalakkersuisut atuutsitsilernissamik sulissuteqarput.
Aningaasaqarnermut Akileraartarnermullu Naalakkersuisoq, Aqqaluaq B. Egede, saqqummiussissumi ullumi Inatsisartuni suliarineqartumi taama ilisimatitsivoq.
Ilanngaatit allanngunngitsut
Akileraartarnikkut ilanngaatit ukiumi 2018-imi akileraarfiusumi allanngortinneqassanersut, Inatsisartut aalajangiinissaannut saqqummiussaq tunngavoq.
- Naalakkersuisut siunnersuutigaat 2018-imi akileraarutitigut ilanngaatissat il.il. 2017-imut sanilliullugit allannguuteqassanngitsut, tassa Naalakkersuisut sulinermi ilanngaammik eqqussinissartik sulissutigimmassuk, taamaalilluni ilanngaammut taama ittumut aningaasaqarnikkut iliuuseqarfissamik pilersitsisoqarsinnaalersinniarlugu, saqqummiussissummi tamanna allaqqavoq.
Danmarkimi sulinermut ilanngaammik qangali atuutilersitsoqarnikuuvoq, sulineq pisortanit pisartagaqarnermit soqutiginarnerulersinnissaanut siunertaqarluni.
Tamanna ajornartorsiut Nunatsinni aamma ilisimaneqarpoq, pisortat tapiliussaat katikkaanni innuttaasut ilaannut suliffittaarnissamut soqutigiunnaarsitsisarpoq.
Kingullermik 2005-imi allanngortinneqartut
Ilanngaatit aammalu kommuninut ataatsimut akileraarut 2005-imi akileraartarnikkut aaqqissuusseqqinnerup kingorna allannguuteqartinneqanngitsut ilisimatitsissutigineqarpoq, taamani ilanngaatit katillugit 10.000 koruuninik qaffanneqarsimapput taakkulu saniatigut kommuninut ataatsimut akileraarut 2 procentpointinik qaffanneqarsimalluni.