avammut niueqqusiunnaarneq

Nungusaataasumik aaffanniarneq

Nunatsinni aaffanniartarneq pillugu pinngortitamut naalakkersuisoq immikkut ittumik nalunaaruteqarpoq

Namminersorlutik Oqartussat Pinngortitamut Avatangiisimullu Naalakkersuisoqarfia sisamanngornermi nalunaarpoq, ulloq 1. august 2016-imi aavernit tunisassianik avammut annissinissamut unitsitsigallarneq atuutilissasoq.

Tamanna immami uumasumik miluumasumik sumiiffimmi aalajangersimasumi nungusaataanngitsumik tunngavilimmik piniagassaqarunnaaneranik pissuteqarpoq.

Mianersussaagut
- Pinngortitaq najugarput uumasuilu asseqanngitsuupput. Taamaattumillu aamma akissarsiorfittut pingaaruteqartuupput, meeqqatsinnut ernuttatsinnullu iluaqutaasinnaanissaat qulakkeerniarlugu paarilluartariaqakkavut, pinngortitamut, avatangiisinut aamma nukissiornermut naalakkersuisoq, Mala Høy Kúko, tusagassiuutinut nalunaarummini tunngavilersuivoq.

- Taamaattumik uumasoqatigiit qanoq inneri nakkutigaarput, maannalu aavernik piniarnerup maannarpiaq nungusaataanngitsumik naliliiffigineqarnera tunngavigalugu iliuuseqarpugut. Taamaalilluni aavernit tunisassianik avammut annissisarnerup maleruagassiuunneqarnissaa pisariaqalersimavoq – taamaalilluta uumasunik sunnertiasunik piniarneq nungusaataanngitsumik ingerlanneqarsinnaanngippat, avammut annissinnginnissamut nunani tamalaani pisussaaffipput naammassissagatsigu.

Atuaruk: Ukiumi aaffattassat Krusep aalajangerpai

Aaffanniarneq nungusaataanngitsumik ingerlanneqaqqissinnaalerpat, piniartut nunallu aningaasaqarnerannut iluaqutaasumik avammut annissisinnaaneq ammaateqqinneqassaaq, Atassummi politikeri neriorsuivoq.

Piumasaqaatinut naammassinninniartut
Kúkop naalakkersuisoqarfia naapertorlugu aaveqatigiiaat ataatsit tassani pineqarput, tassalinilu Pinngortitaleriffiup nungusaataanngitsumik atuinissamut nalunaarummini kingullermi naliliivoq, piniarneq illersorneqarsinnaanngitsoq.

Kalaallit Nunaat aaffanniarnermut tunngatillugu ilisimatusarnikkut CITES-imut ataqatigiissaarinikkut nalunaarsuisarpoq, taanna Convention on International Trade in Endangered Species of Wild Fauna and Flora nunani tamalaani isumaqatigiissutaavoq.

Atuaruk: Aarrit nunatsinni nungusarneqanngillat

Powered by Labrador CMS