klimaforandringer

Nunatta silap pissusianut quppernera ammaqqippoq

Climate Greenland Kalaallit Nunaanni silap pissusiata allanngoriartorneranut paasissutissanut ilisimasanullu isertarfiuvoq

Ullumi sisamanngornermi ineqarnermut, pinngortitamut avatangiisinullu kiisalu nunani avannarlerni suleqatigiinnermut Naalakkersuisup Miiti Lyngep, Partii Inuit, climategreenland.gl nutaaq - Kalaallit Nunaanni silap pissusiata allanngoriartorneranut namminersorlutik oqartussat quppernerat - atuutilersippaa.
Climate Greenland Kalaallit Nunaanni silap pissusiata allanngoriartorneranut paasissutissanut ilisimasanullu isertarfiuvoq Tassani silap pissusiata allanngoriartornera atituumik sammineqarpoq siunertaralugulu tikeraat sunnerniassallugit ingerlatsivippassuarni suliniuterpassuarnilu linkerfigineqarsinnaasuni paasissutissanik amerlanerusunik ujarlernissaannut.
Isertarfik kalaallisut, qallunaatut tuluttullu allataavoq, innuttaasunullu Kalaallit Nunaanni nunanilu allani, sammitinneqarluni.
– Climategreenland sulianik ingerlatsivinnillu, Nunatsinni silap pissusianik samminnittunik, ataatsimut katersuiffiuvoq takutitsiffiullunilu. Neriuppunga qupperneq atuarfinni, tusagassiortunit allanillu tamanit silap pissusiata allanngoriartornerata Kalaallit Nunaannut sunniutaanik annertunerusumik paasisaqarusuttunit atorneqarsinnaassasoq. Taanna paasiuminartumik allanneqarsimavoq sammisassanillu immikkut soqutigineqarsinnaasunik itinerusumik paasisaqarnissamut periarfissiilluarluni. Nuannaarutigaara qupperneq ullumi ilisaritissinnaagakku, qilanaaraaralu atuartitsinermut atatillugu allanullu attuumassutilinnut atatillugu atorneqalernissaa, Miiti Lynge oqarpoq.
Pingaarnerit sisamat
Climategreenland.gl 2009-miilli atulersimavoq aallaqqaammullu pilersinneqarsimalluni 2009-mi decembarimi Københavnimi EU-p silap pissusia pillugu ataatsimeersuarnissaanut piareersarnermut atatillugu.
Naalakkersuisut qupperneq atuutilerseqqippaat nutaamik iliusilerluguj imarisaalu nutarsarlugit.
Quppernermi nutaami sammisat pingaarnerit sisamaapput ´silap pissusianik ilisimatusarneq´, ´aniatitsineq annikillisaanerlu´, ´silap pissusianut naleqqussarneq´ aamma ´nunani tamalaani suleqatigiinneq´, tassanilu silap pissusiata allanngoriartornerata Kalaallit Nunaannut unammilligassartai periarfissaalu isummerfigineqarput.
Climategreenland.gl uani iserfigisinnaavat
Climategreenland.gl qanoq isumaqarfigaajuk?

Powered by Labrador CMS