qalipakkanik saqqummersitsineq
Nunatta Katersugaasiviata Bolatta Silis-Høeghip saqqummersitsinera nutaamik uumassusilerpaa
Bolatta Silis-Høeghip Kastrupimi Bryggergårdenimi eqqumiitsulianik saqqummersitsinera "Lights On Lights Off" suli angumerisinnaavat
Bolatta Silis-Høeghip saqqummersitsineranit "Lights On Lights Off"-imit eqqumiitsuliat pingaarnerit tallimat Nunatta Katersugaasiviata pisiarai. Katersugaasiviup kissaatigaa qalipakkat Kalaallit Nunaannit pigineqassasut, siunissami kalaallinut saqqummersinneqartassammata.
"Inside", "Outside", "Lights Off" aamma "Selfie". Kalaallip eqqumiitsuliortup Bolatta Silis-Høeghip eqqumiitsuliai tallimat taama taaguuneqarput, taakkualu ulloq manna tikillugu Kastrup Havnip eqqaani Bryggergårdens Kongelejlighed-imi saqqummersitsinermi "Lights On Lights Off"-imi takuniarneqarsinnaapput. Ataasinngorpat ullaakkut qalipakkat iikkanit peerneqassapput Nuummilu piginnittumut, Nunatta Katersugaasivianut, nassiunneqarlutik.
Attassineq nersorinninnerlu
Eqqumiitsuliat Bolatta Silis-Høeghhip inuttut nammineq qisuariaatigai, Nunatsinni uranimut akuersaanngilluinnarnerup atorunnaarsinneqarneranut. Qisuariarnermigut eqqumiitsuliortup sammisat, Kalaallit Nunaanni qaqutiguinnaq oqaluuserineqartartut, isiginiarpai. Politikkersornersuaq inuiaqatigiinnilu ajornartorsiutit eqqumiitsuliatigut takutinneqarput, taakkualu Nunatta Katersugaasiviata pilerinartippai.
– Eqqumiitsuliatigut oqaatigisinnaanngisat saqqummiunneqarsinnaapput, saqqummersitakkullu "Lights On Lights Off" Bolatta Silis-Høeghip inuiaqatigiinni unammilligassarujussuit isumassarsiornartumik takutippai. Pingaaruteqarpoq kalaallinit eqqumiitsuliortunit eqqumiitsuliatigut malunnaatilimmik takutitsisut tamakkua uagut pigisatsitut pigiinnarnissaat, sapinngisamik amerlanerpaat nuannaarutissaattut, Nunatta Katersugaasiviani pisortaq Daniel Thorleifsen oqarpoq.
Bolatta Silis-Høegh nammineq oqarpoq: - Kissaatigiuaannarsimavara "Lights On Lights Off" arlaatigut Kalaallit Nunaannukassasoq. Taamaattumik nuannaarutigeqaara saqqummersitsinermit eqqumiitsuliat pingaarnerit maanna Nunatta Katersugaasiviata pigilissammagit. Tupinnaqaaq eqqumiitsuliat taamaasilluni Kalaallit Nunaanni, angerlarsimaffivimminni, nutaamik uumassuseqalissammata.
Takutitseriaaseq nutaaq
Københavnimi saqqummersitsineq Bolatta Silis-Høeghip ukiuni sisamangajanni saqqummersitsisimanani saqqummersitsineraa, tamannalu qallunaat aviisiini nunatsinnilu tusagassiorfinnit sammineqarsimavoq. Saqqummersitap AG-mi nalunaarutiginerani Kirsten Thisted ilaatigut allappoq: "Eqqumiitsuliornikkut takutitseriaaseq nutaarluinnaq Silis-Høeghip atorpaa. Siusinnerusukkut Kalaallit Nunaata nunarsuarmik isiginninnera quianartumik saqqummiuttakkani qimallugu. Saqqummersitsineq una qungujunnartortaqanngilluinnarpoq. Akerlianik nalissaqanngilluinnartoq kusanarluinnartorlu".
Suli ilisimaneqanngilaq qalipakkat qaqugu Kalaallit Nunaanni saqqummersinneqassanersut, saqqummersitsinerli "Lights On Lights Off" Kastrup Havnimi Bryggergårdenimi ullumikkut sapaammi naggataamik takuniarneqarsinnaavoq.