misissuineq
Nunatta karsianit atornerluisarnerit Naalakkersuisunit ima unitsinneqassapput
Kaajallaasitamut missingiutip nutaap Naalakkersuisut aningaasat atortagaannut, soorlu ilassinninnernut, nerisaqarnernut, tunissutinut, angalanernut, unnuinermut aningaasartuutinut namminernullu angalanernut killiliisussatut siunnerfigineqarpoq
Kalaallit Nunaata karsia nammineq aningaasaateqarfittut atorneqartarunnaassaaq. Naalakkersuisut aningaasartuutaat Namminersorlutik Oqartussanit pitsaanerusumik aqunneqalissapput.
Naalakkersuisut taama erseqqitsigisumik allagaqarput.
Naalakkersuisut kukkunersiuisut Naalakkersuisuni ilaasortaasimasut nunattaa karsianik atuisarsimanerannut Deloittemit suliarineqartut misissuinerannut oqallisaaqisumut oqaaseqaateqartoqarpoq. Naalakkersuisut siulittaasuat, Kim Kielsen Siumut, tassunga atatillugu kaajallaasitamut missingiummik atuutingajalersumik ilisimatitsivoq.
Aningaasartuuterpassuit aqunneqarnissaat
'Naalakkersuisunut ilaasortanut aningaasartuuteqartarneq il. il. pillugu kaajallaasitaq' Naalakkersuisunut ilaasortanut aningaasartuutigineqartartunut, soorlu ilassinninnernut, nerisaqarnernut, tunissutinut, angalanernut, unnuinermut aningaasartuutinut namminernullu angalanernut killiliisussatut siunnerfigineqartoq Naalakkersuisut siulittaasuata oqaatigaa.
Kaajallaassitaq Naalakkersuisunut ilaasortat aamma Namminersorlutik Oqartussat siunissami nutaanik akuerisaanngitsumik akiligassaqartoqalernissaa pinngitsoornissaanut Naalakkersuisut siunissami qanoq iliuuseqartarnersut assersuutaassasoq Kim Kielsenip oqaatigaa.
Marlunnik anguniagaqartoq
Naalakkersuisut namminneerlutik angalanerannut aningaasartuuteqartarneq Naalakkersuisunit siornatigut unammilligassarujussuusartoq Kim Kielsenimit oqaatigineqarpoq.
Taamaattumik sulilluni angalanermi atatillugu pisumik nammineq inuttut angalanermut atatillugu, angalanerup nammineq inuttut angalanermut tunngasortaanut aningaasartuutit, Naalakkersuisoqarfiup inniminniinerani Naalakkersuisunut ilaasortap nammineq inuttut kreditkortiminut paasissutissanik tunniussineratigut, Naalakkersuisunut ilaasortamit akilerneqartassasut, Naalakkersuisunut kaajallaasitami nutaami aalajangersarniarpaat.
- Nammineq inuttut angalanermut aningaasartuutit Namminersorlutik Oqartussat akiligassiissutinut periaasianut annguttarnissaat pinngitsoorniarlugu, aammalu Namminersorlutik Oqartussat Naalakkersuisunut ilaasortanit 'kassekredit'-itut atorneqarnissaat aarlerinaateqarunnaarsinniarlugu, aalajangersakkamut siunnersuut ilanngunneqarpoq, Kim Kielsen nassuiaavoq.
Suliffeqarfik kukkunersiuisut Deloitte, 2009-mit 2014-mut Naalakkersuisuni ilaasortat misissorpaat.
Deloittep misissuinerminut atatillugu kaajallaasitap nutarterneqarnissaa Naalakkersuisunut siunnersuutaat atuutilissaaq.