Nunatta karsia sinneqartuungaatsiartoq

2016-imut Nunatta Karsiata Naatsorsuutai kukkunersiorneqarlutik naammassipput.

Naatsorsuutit takutippaat, Nunatta karsiata Namminersorlutik Oqartussat ingerlatsinermut, 211 millioner koruuninik sinneqartoorfiusimasoq. Tassa missingersuutit katillugit 311 mio. koruuninik pitsaanerusumik nikingassuteqarput.

Naatsorsuutit pitsaasumik inerneqarneranut tunngaviit arlaliupput, Aningaasaqarnermut Naalakkersuisoq Aqqaluaq B. Egede (IA) oqarpoq.

- Naatsorsuutigineqartumit aalisarluarneruneq immikkut pitsaasumik sunniuteqarpoq. Aalisagaqatigiit amerlanerpaat eqqarsaatigalugit amerlassutsitigut siuariartortoqarsimavoq, matumani pingaarnerit: Raajat, qalerallit aamma saarulliit. Tulliatullu sanaartornermi aningaasaliinerit annertuut soorlu Nuummi isertitsiviliorneq umiarsualiviliornerlu nunatta karsianut pitsaasumik sunniuteqarsimapput, tusagaasiuutinut nalunaarummi taanna oqarpoq.

Aningaasaqarnernikkut sukangasuumik aqutsineq

Aqqaluaq B. Egedep angusat tupinnanngitsumik iluarisimaarpai.

- Naatsorsuutini aamma ukioq manna sinneqartooqqinnerput pitsaasuuvoq, taanna erseqqissaavoq.

Aningaasaqarnermut Naalakkersuisup nuannaarutigaa, kommunit tamarmik 2016-imi inernerusunik qajannaatsunik takutitsissasut naatsorsuutigineqarmat.

- Aningaasaqarnikkut inernerusut pitsaasut maannamit eqqissisimaarluta uninngaannalernissatsinnik aningaasartuutillu aqunneqaratik qaffakkiartortinnissaannik pissutississanngilaatigut. Killormuanilli pingaaruteqarpoq, aalajangersimasumik siunnerfeqarluta ingerlaannarnissarput aningaasaqarnermillu sukangasuumik aqutsinissarput attatiinnassagipput. Aningaasartuutinik nutaanik, aningaasaqarnikkut pissakinnerusunik kivitsinissamik kiisalu inuiaqatigiinni aningaasaqarnikkut naligiinnginnerup annikillisinnissaanik pingaarnertut anguniarneqassapput, Aqqaluaq B. Egede erseqqissaavoq.

Aaqqissuusseqqinnerit pisariaqartut

Nunatta karsiata inerneri pitsaasut isumaqanngillat, siunissami aningaasaqarnikkut unammilligassagut aaqqinneqartut, tanna oqarpoq.

- Unammilligassagut suli taakkuupput. Siunissaq ungasinnerusoq eqqarsaatigalugu aningaasaqarnikkut attassisinnaaneq qulakkeerniarlugu iluarsaaqqinnissanik suli pisariaqartitsivugut, taanna tikkuaavoq, nangillunilu:

- Inuiaqatigiit katitigaaneranni unammilligassat, siunissami soraarnerussutisiallit sulisinnaasunit amerlanerulernissaat suli taakkuupput. Inuiaqatigiinni innuttaasut amerlavallaat imminnut pilersorsinnaanermut periarfissaqannginneranik ajornartorsiut suli taannaavoq. Sulilu aningaasaliinissamut pisariaqartitsinerit annertupput s.i. mittarfinnik sanaartorneq, suli inissivinneqanngitsoq. Eqqissisimaarnissatsinnut suli siusippallaarpoq. Eqqissiimisinnaanngorpugulli, Aningaasaqarnermut Naalakkersuisoq, Aqqaluaq B. Egede oqarpoq.

2016-imut Nunatta Karsiata Naatsorsuutai Inatsisartunit akuersissutigineqassapput. Siunnersuut 1. juni 2017-imi siullermeerneqassasoq naatsorsuutigineqarpoq, aappassaaneerneqarnissaalu ukiakkut ataatsimiinnermi pissasoq, Namminersorlutik Oqartussat paasissutissiipput.