tunuanit
Nunatta Isiginnaartitsisarfiani ammasumik misilitsinnermut aggerit
Isiginnaagassiamik 'The Bluesimik' suliarinnittut isiginnaartitsinnginnermi qanoq piareersartanersut, isiginnaartitsinermik soqutigisaqartut takunissaanut qanittukkut periarfissaqalilerput
Nunatta Isiginnaartitsisarfia marlunngornermi februaarip 16-iani nalunaaqutaq 19.00 ammasumik misilitsinnissamut qaaqqusivoq.
Taamaalilluni isiginnaartitsinermik soqutigisaqartut, isiginnaagassiamik 'The Bluesimik' isiginnaartitsisussat qanoq piareersartarnersut takunissaannut periarfissinneqarput.
Piareersarnerit amerlasuut
Marsip pingajuanni 'The Blues' takuteqqaarneqassaaq, isiginnaagassialli naammassinissaanut piareersarnissat suli amerlapput.
- Isiginnaagassiamik 'The Bluesitut' ittumik piareersarneq qanoq ittuunersoq innuttaasunut takutikkusupparput, suliarinnittunillu oqaloqateqartinnissaannut periarfissillugit. Nipilersortartunik pulaartoqarpugut, aammalu eqqumiitsuliornerup tungaatigut atit ilisimaneqarluartut isiginnaagassiami peqataatippagut, isiginnaartitsisarfimmi pisortaq Susanne Andreasen oqaluttuarpoq, nangillunilu:
Misiliineq
- Takutitseqqaarnissap tungaanut ulapiffiusarpoq. Kisianni sulinerput innuttaasunut takutikkusupparput. Taamaattumillu immikkut ittumik, akeqanngitsumillu qaaqqusivugut. Isiginnaartut isiginnaagassiaq piariigaq takussanngilaat, kisianni sungiusatigalugu unnummi misiliineq silarsuatsinnit takussavaat.
Isiginnaagassiami 'The Bluesimi' nipilersorneq isiginnaartitsinerlu kattunneqarput. Isiginnaagassiarlu isiginnaartitsisarfimmi pisortaasimasumit Svenn Syrinimit isumassarsiaavoq. Isiginnaagassiaq Kalaallit Nunaanni aamma Nunat Avannarlerni nipilersortartut isiginnaartitsisartullu tusaamaneqarnerpaat ilaannit peqataaffigineqarpoq.
Arnat nukittuut
Isiginnaartitsisarfimmiissapput Marianne Nielsen 'Varna' annertuumik nipeqartoq qajannartunillu erinaateqartoq, aamma Marie Mathiassen 'Maalia', arnatut asanninnermik unammillertutut.
Assilissanik eqqumiitsuliortoq Bolatta Silis-Høegh isiginnaartitsiviup kiluani aaqqissuussisuussaaq aamma atisaliortuulluni, atuakkiortorlu Niviaq Korneliussen oqaluttualiortuuvoq.
Ilitsersuisoq svenskeq
Varnap nipilersugaanik nipilersortuupput Nino Fencker, Fabrizio Barzanti, Anders Øgaard, Ulrik Wigh aamma Odda Eilertsen.
'The Blues' svenskimit isiginnaartitsisartumit aamma ilitsersuisartumit ataqqineqartumit, Jerker Fahlströmimit ilitsersuisoqarpoq, taanna Nunatta Isiginnaartitsisarfiani isiginnaagassianik allanik suliaqarnermik misilittagaqarpoq.
Nunatta Isiginnaartitsisarfiata Arctic Winther Games 2016-imut 'The Blues' tapiliussaraa.
Atuaruk: Nunatta Isiginnaartitsisarfia sinerissami angalaartoq