ikiortissarsiortut

Nunatta Isiginnaartitsisarfia angutit isiginnaagassiariniarpaat - pissarsiorpullu

Nunatta Isiginnaartitsisarfiata isiginnaagassiai tulliuttut sunniuteqarfigisinnaavatit

Fiskere, kursus, Qaanaaq

Nunatta Isiginnaartitsisarfia isiginnaagassiassaminik pilersaarusiorluni aallartitsivoq, Angutivimmik, taaguutilimmik, tassunga atatillugu angutinit oqaluttuanik, eqqarsaasersuutinik, erinarsuutinik, oqalualaanik taalianillu pissarsiorpoq.

Tamannalu (neriuutigineqarpoq) isiginnaagassiamik inerneqarumaartoq, angutit kalaallit oqaluttuaannik aallaveqartumik.

Allaalaartoq qungujunnartorlu
- Ima oqaraanni mikrofoni angutinut isaakkusupparput inuunerminnik oqaluttuaqqullugit. Oqaluttuat tissinartuusinnaapput, tiinganermut tunngasuusinnaapput, tupinnartuliaasinnaapput, annernartuusinnaapput allarujussuusinnaappulluunniit, angutip kalaallip ullumikkut nunatsinniikkuni Danmarkimiikkuniluunniit inuuneranik ersersitsisussat, taama ilitsersuisartoq Hanne Trap-Friis oqarpoq.

Taanna isiginnaartitsisarfimmiit FreezeProductionsiumeersuusoq Nunatta Isiginnaartitsisarfianik suleqateqarluni isiginnaagassiuliortuuvoq.

Immaqa ilaasa taassuma atia isiginnaagassiamik Sarfartuumit ilisaraat,tassani Nukâka Coster-Waldau pingaarnertut inuttaralugu isiginnaagassiortuusimasoq.

Isiginnittariaaseq unammillerniaraat
- Suna tamarmi pinngorpoq Hannelu oqaloqatigiinnitsinni, kalaallinik angutinik isiginnittariaaseq nutaartaqanngitsoq eqqartuleriaratsigu, isiginnaartitsisarfimmi pisortaq Susanne Andreasen oqarpoq.

- Illuatungaani nunap inoqqaavisa oqaluttuarisaanerat kusassagaq piviusorsiunngitsoq sorlaqarfinnut uteriarnertalik; inuup toqqissisimasumik pinngortitamiinnera. Illuatungaanili oqaluttuat ullutsinneersut persuttaasarneq, imerajuttuuneq, kinguaassiutitigullu atornerluinerit kalaallit akornanni pisartut, nunatsinni Danmarkimilu pisartut, tamakkulu unammillerusuppagut.

- Angutinik tusartakkagut amigarput, taamaattumik oqaluttuat taakkunaninngaanneersuunissaat anguniarparput. Ugutsinnut pingaarpoq angutit namminneerlutik oqaluttuaat aallaaviussasut, kiisalu inuttaanniik tusassagigut pingaaruteqarluni.

Atuakkiortoq suleqataasoq
Oqaluttuat takkussuuttut nunatsinneersut Danmarkimeersullu tamakkerlutik ilitsersuisartumit isiginnaartitsisartunillu Miké Thomsenimit, Hans-Henrik Poulsenimit, Klaus Geislerimit Miki Jacobsenimillu suliarineqassapput isiginnaagassianngorlugit Angutivimmik taaguutilimmut.

Niviaq Korneliussen pilersaarummi peqataatinneqassamaarpoq isiginnaartitsissusiortartutut oqaatsinillu siunnersuisartitut.

Hanne Trap Friis Danmarkimi Kalaallit Illuutaat suleqatigalugit paasissutissiinertalimmik ataatsimiititsereersimalerpoq, augustillu ulluisa 25-anni nalunaaqutaq 19.00 Nuummi ataatsimiititsissamaarpoq.

Kinaassutsimik isertuussinissamut periarfissaqartoq
Ataatsimiititsinermi tassani isiginnaartitsisartut siunnersortaasussarlu naapinneqarsinnaassapput, suliareriikkanillu qilanaartuutissiisoqassaaq.

- Kikkulluunniit tikilluaqqusaapput. Nunatta Isiginnaartitsisarfiani, industrivej 27-mi ingerlasussami, isiginnaartitsisarfiup pisortaa oqarpoq.

Oqaluttuat, oqalualaat erinarsuutilluunnit tigujumaakkagut tamakkerlutik kinaassutsimik isertortuussapput. Allanik tusarnaartulerluni unikkaarineqarsimasuusinnaapput, isertuaqisumik oqaluttuarineqarsimasinnaapput allakkatigulluunniilli aamma susanne@nuis.gl imaluunniit hanne@freezeproductions.dk-mut nassiunneqarsinnaallutik.

Isiginnaagassiaq Nunatsinni suliarineqassaaq, Nunatsinnilu aamma Danmarkimi 2017-imi 2018-imilu angalaarunneqassalluni.

Atuaruk: Isiginnaartitsinermik ilinniartoq nunasiaqartuuneq pillugu kisimiilluni suliaqartoq

Powered by Labrador CMS