tusagassiuutit
Nunatta arnanut atuagassiaa atuakkatut saqqummissaaq
Pinnerneqqusaannerit pitsaasuinnaanngitsut, Arnanut saqqummertup tullissaani normu 50-iusumi atuarneqarsinnaassaaq
Nunatta tamarmi arnanut atuagassiaa, Arnanut, novemberip aqqarnani akunnaatsumik angusaqassaaq, saqqummiussat 50-issaa saqqummerpat.
Tamannalu atuagassiami aaqqissuisoqarfiata allatut ittumik iliornikkut nalliuttorsiutiginiarpaat Arnanut quppernernik 32-inik amerlanerusunik imaqartillugu aammalu qeratasuumik oqaluttualiap ungaluatut ittumik naqiterneqassaaq.
Pinnerneqqusaannerit pitsaasuuppat?
Martine Lind Krebs, Arnanumi aaqqissuisooqataasoq oqaluttuarpoq.
- Arnanut 50-imi 'Pinnissuseq suua?' sammineqarpoq. Aki-Matilda Høegh-Damip Miss Danmarkimi peqataanera aallaavigalugu pinnissuseq sammissavarput. Aki-Matilda nammineerluni pinnissutsip suuneranut friskinik innersuussaqarpoq, arnamik pinnersumit immaqa oqaatigineqarnissaanik ilimanaateqarpallaanngitsunik.
Arnanut atuagaq aamma socialantropologimit pinnerneqqusaannernut immikkut ilisimasalimmik apersuinermik imaqarpoq. Taassuma Kalaallit Nunaat Miss Greenlandimut pilersaaruteqarneranut atatillugu mianersoqquaa, isuamaqarlunilu unammisitsinerit qangatut arnanut isiginnittariaatsimut takussutaasut.
Arnamik nersornaasiisarneq atuutsileqqikkaat
Arnap timaa pillugu assit saqqummersitat saniatigut Arnanut 50-ip nalliuttorsiornermut atatillugu, kingumut qiviarnermik arnanik ukiuni aqqaneq-marlunni kingullerni Arnanumik suliaqartarsimasunik ilisiarititsinertaqassaaq.
- Aamma ukiumut arnatsialammik nersornaasiisarnermik ileqqoq atuutilerteqqinniarpaput, Martine Lind Krebs oqaluttuarpoq.
- Taanna kinaasinnaanersoq ujartuivugut, taamaammat arnanut@sermitsiaq.gl allaffigiuk, taama kaammattuivoq.
Nerisat, atisat aamma inip pequsersornera arnanut atuakkami issusuumi Nive Nielsenip nuuteeraliaa nutaaq eqqartorneqassaaq, atuagassiap saqqummernerata nalaani saqqummertussaq. Arnanumi aamma arnat skateboardertartut torraasut Sisimiuneersut oqaluttuarineqarput, atuagassiallu tusagassiortuisa ilaasa Arctic Winter Gamesimi ambassadørit ilaat apersorsimavaat.
Poortugaq pisartagalik
Arnanut atuakkamik pisinermi Arnanut saqqummertussat tulliuttut sisamat ilanngullugit immersuinikkut pissarsiarineqarsinnaapput. Tassanngaanniillu pisartagaqalernermut ilannguttoqassaaq, atorunnaarsillugu aalajangiutinngikkaanni.