qinersineq
Nunatta aningaasaqarnerata equngasumik ingerlanera pissutaalluni Danmark suleqatigineqarnerusariaqarpoq
Aningaasaqarnerup inissisimanera pissutaalluni namminiilivinnissamik takorluugaqarneq unitsiimineqarallarpoq
Inatsisartunut ukioq kingullermik qinersinermi namminiilivinnissaq annertuumik oqallisigineqarpoq. Qineqqusaartut Ilulissani tamanna maannakkut oqaluuserineqarpallaanngilaq.
Tamanna aningaasaqarnerup inissisimanerata peqqutigisaanik oqallinnerup annikillisimanera pissutaasoq antropologi aamma innuttaasunik ilisimatooq Klaus Georg Hansen oqarpoq. Kalaallit Nunaata aningaasaqarnera 2014-mut 275 million koruunit sinnerlugit amigartoortussaavoq.
- Aatsitassarsiornissaq uuliasiornissalu annertuumik kingullermik qineqqusaarnermi oqallisigineqarpoq. Inuppassuit isumaqarsimagaluarput siunissami qaninnerusumi aallartikkumaartut, taamaattumik namminiilivinnissaq annertunerusumik eqqartorneqarpoq 2013-mi qineqqusaarnermi, Klaus Georg Hansen oqarpoq.
Aleqa Hammondip qineqqusaarnermini kingullermik oqaatigaa Kalaallit Nunaat inuunermini namminersulivinnissaanik oqalunneq piviusorsiortuusoq.
Kingullermik qineqqusaartoqarneranit allanik pisoqarfiunikooqaaq. Aatsitassarsiornissaq unikaallatsinneqarpoq aamma uuliasiortoqalinngilaq.