Nunatta Angalatitsiviata Ulu Travel pisiaraa

Novembarip aallaqqaataani Nunatta Angalatitsiviata, Air Greenlandip suliffeqarfianut ilaasup, Ulu Travel Qaqortumiittoq tigussavaa.

Taamaalilluni nunatsinni kommunini sisamaasuni tamani najuunnissamik kissaateqarneq naammassineqassaaq, angalatitsivik tusagassiorfinnut nalunaarummi ilisimatitsivoq.

Nunatta Angalatitsivia ullumikkut Nuummi, Sisimiuni Ilulissani, Aalborgimi Københavnimilu allaffeqarpoq.

Pilersaarummut ilaaginnartoq
- Nunatta Angalatitsivia maanna Kalaallit Nunaanni kommunini sisamaasuni tamani najuutilersussanngorpoq. Taamaalilluta nuna tamakkerlugu sullissilerpugut, aammalu Kalaallit Nunaanni illoqarfinni annerni sisamani najuutilerpugut. Ulu Travelip tiguneqarnera Nunatta Angalatitsiviata annertusaanissamut pilersaarutaanut ilaaginnarpoq, aammalu piffissami sivitsortumi Kommune Kujallermi najuutilernissatsinnut, aammalu attaveqaatitsinnut Kalaallit Nunaata kujataata ilanngunnissaanut periarfissat misissorsimavavut, Peter Bastrup, Nunatta Angalatitsiviani pisortaaneq ilisimatitsivoq.

Niuerfik patajaatsoq
2010-mili Najârak’ Skifte Møller Qaqortumi Ulu Travelimik ingertsisuusimavoq. Najârak’ niuerfimmik patajaatsumik Kommune Kujallermi pitsaasunik attaveqaqatigiiffeqartumik attaveqartumillu inerititsisimavoq.

- Piffissami sivitsulersumi suliffimmut annerusumut ilaanissap pitsaaquteqarnera eqqarsaatigisimavara, taamaattumillu niuerfiup Nunatta Angalatitsivianut ilaatilernissaa tulluutsissimavara, Najârak’ Skifte Møller oqarpoq.

Ingerlaannassasoq
Najârak’ Skifte Møller novembarip ulluisa aallaqqaataanni Nunatta Angalatitsiviani atorfinissaaq, maannamullu sullissinini ingerlatiinnarlugu kujataamiunik sullissilissalluni. Piffissap ilaani, pingaartumillu aasaanerani Qaqortumi Campus Kujallermi takornariaqarnermik ilinniartitaanermi ilinniartunik allaffimmi sulilluni misiliisoqartassaaq.

Nunatta Angalatitsiviani atorfilli maanna 31-iupput ilinniartullu marluullutik. Angalatitsivimmi suliassaqarfiit marluk aallunneqarput: Ingerlatseqatigiiffiup Kalaallit Nunaanni inuussutissarsiutinik ingerlataqartut inuinnaallu angalasarneri aallunneqarput, kiisalu Danmarkimi inuussutissarsiuteqarnermik ingerlataqartut inuinnaallu angalasarneri takornariaqarnerlu aallunneqarlutik suliat marloqiusaallutik.