Nunatsinnut hashimik eqqussisarneq ajornarnerulissaaq

Angalasut hashimik nioqqutissaniluunniit allanik timiminni toqqortaqarlutik nassataqarnissaminnut pasinarsinnaasut, Kangerlussuarmi aappaagumiit timimikkut scannerneqarsinnaalernissaat periarfissaasinnaavoq.

Naalakkersuisummi nioqqutissanik eqqussuineq annissuinerlu pillugit Inatsisartut inatsisaata allanngortinneratigut taamaaliorusupput.

Aningaasaqarnermut aatsitassanullu naalakkersuisup, Demokraatineersup Anda Uldummip, nioqqutissanik eqqussuineq annissuinerlu pillugit Inatsisartut inatsisaata allanngortinneqarnissaanut siunnersuuteqarneratigut, Akileraartarnermut Aqutsisoqarfik aappaagumit atuutilersumik Kangerlussuakkoorlutik angalasut timaannik scannerisinnaalissaaq, Inatsisartut Naalakkersuisut nioqqutissanik eqqussuineq annissuinerlu pillugit Inatsisartut inatsisaata allanngortinnissaanut siunnersuutaat akuersissutigissappassuk.

Akileraartarnermut Aqutsisoqarfik ullumikkut inatsisitigut pisinnaatitaareerpoq angalasunik misissuinissaminut. Inuullu timaanik misissuineq taamaallaat pisinnaavoq ilimagineqarpat pineqartoq inatsisinik unioqqutitsilluni nioqqutissanik timimi iluanut toqqortuisimasoq.

Pissuteqarluni pasillernermi atorneqarsinnaavoq
- Teknologi nutaaliaasoq atorlugu maanna inuit timaat attuuallugit misissunngikkaluarlugit tarrarsuinermi qinngornerit atorlugit scannerneqarsinnaapput. Ilaasumik scannerineq qinngornerit iluaqutigalugit pisarpoq, ilaasullu nioqqutissanik allanillu timimi iluanut toqqortuilluni eqqussiniarnera pissuteqavissumik ilimagineqarpat aatsaat atorneqassaaq. Angalasunik ataasiakkaanik scannerinissaq pasinaateqarnerannik naliliinikkut pisassaaq, ilaasullu tamarluinnaasa misissorneqarnavianngillat, lyder i bemærkningerne til forslaget.

Inatsimmi allannguutissatut siunnersuutigineqarpoq angalasup scannerneqarnissani nammineq akuersissutigisassagaa, angalasullu scannerneqarnissani aamma sukkulluunniit itigartitsissutigisinnaassagaa.

- Angalasup scannerneqarnissani kissaatiginngippagu pineqartoq pisarnertut timaatigut misissorneqassaaq, ilaatigut siunnersuummut oqaaseqaatit ilaanni taama allassimavoq.

Aappaagu atulernissaa naatsorsuutigineqarpoq
Akileraartarnermut Aqutsisoqarfik scannerummik pisiniarluni akinik neqeroortitsilereersimavoq, aqutsisoqarfimmillu naatsorsuutigineqarpoq scannerut 1,5 millioner koruunit pallillugit akeqarumaartoq. Tassa nassiunnera ikkussuunneralugu ilanngullugu.

- Pisinissaq piffissaq ungasinnerusoq eqqarsaatigalugu sulisut nakkutilliinermi suliassanik alla- nik suliaqarsinnaalernissaannik kinguneqassangatinneqarpoq, nioqqutissanik eqqussuineq annissuinerlu pillugit Inatsisartut inatsisaata allanngortinnissaannut siunnersuummi ilaatigut taama allaaserinnittoqarpoq.

Akileraartarnermut Aqutsisoqarfimmit timimut scannerutip Kangerlussuarmi aappaagu umiarsuaqareerpat atorneqalersinnaanera naatsorsuutigineqarpoq.