isumaginninneq
Nunatsinniit qimaasut
Kalaallit amerlanerujartortut inuuniarnikkut ajornartorsiuterpasuallit Jyllandip avannaanut Aalborgip Kommunianut nussorput. Danmarkimulli nuunneq pilluaataajuaannanngitsoq misissuinermi nutaami uppernarsarneqarpoq
Kalaallit inuuniarnikkut oqimaatsunik ajornartorsiutillit Aalborgimi 300-ut missaanniipput kalaallinit 1.400-t missaanniittunit. Kisitsisit nutaat tamanna takutippaat aammalu tassani takuneqarsinnaalluni inuuniarnikkut ajornartorsiutillit nuuttartut amerliartortut. Kisianni Danmarkimi atugarissaarnerulerneq ajorput. Amerlanerit nutaanik ajornartorsiutitaartarput Nunatsinni ajornartorsiutigeriikkami qaavisigut.
Aalborgip Kommuniani kalaallinik ikiuiniartut kalaallit 300-ut missaat ikiorpaat taakkulu pisartagaqarput isumaginnikkullu tapiissummik ilinniartuunersiaqarlutik.
- Ilaatigut piffissaq sivisooq ingerlareersoq aatsaat paasisarparput noorlaat inuuniarnikkut ajornartorsiuteqartut. Tassuna nassuiaatissat ilagaat ajornartorsiorluinnaleraangamik aatsaat kalaallit saaffiginnittaramik. Soorlu ulloq taanna inigisaminniit anisitaasussanngoraangamik imaluunniit aningaasanik amigaateqaleraangamik, Karolina Heidarsdottir Jensen oqarpoq.
Noorlaat meerartaat atuarniarnermikkut ajornartorsiuteqartarput. Ajornartorsiummut AG imaqarluartumik allaaserinnippoq.