ikummatissaq
Nunatsinni umiarsuit uulia oqimaatsoq atorpaat
Uulia HFO-mik taaneqartartoq mingutsitsisarpoq, nunarsuarmik kissatsitsiartoqataalluni uuliaarluertoqarneranilu salikkuminaatsuulluni, taamaattumik amerliartuinnartut Issittumi atugaanissaa inerteqqutigaat. Inerteqquteqarnerup kinguneqaatissai Naalakkersuisut misissuleruttorpaat.
Aatsitassarsiorluni suliniuteqartoqaraangat selskabit uuliamik oqimaatsumik – HFO, heavy fuel-imik taaneqartartumik – ujaasinermi assartuinermilu umiarsuarmi orsussatut atuinissamik qinnuteqartut Namminersorlutik Oqartussat itigartittarpaat.
Kalaallilli umiarsuaatileqatigiiffiini pissutsit allaanerulluinnarput. Maani uuliap oqimaatsup atorneqarnissaa akuerineqarlunilu nalinginnaasumik atorneqarpoq, tamanna AG-p sianeqattaarnermigut paasivaa. Royal Greenlandip Arctic Umiaq Linelu umiarsuaasa orsussaq oqitsoq atortaraat Polar Seafoodimi Royal Arctic Linemilu (RAL) atuineq allaaneruvoq.
– Umiarsuatsinni anginerusuni – Nuka, Irena, Mary aamma Malik Arcticami heavy fuel atorparput – umiarsuarnili mikinerusuni dieseluulia atorlutigu, RAL-ip pisortaata tullia ingerlatsinermut akisussaasoq Taitsiannguaq Olsen uppernarsaavoq.
Toqqaaneq assortuussutaasoq
Uuliamik oqimaatsumik atuineq assortuussutaaleraluttuinnarpoq. Tassami amerlasuunit isumaqatigineqarpoq uulia oqimaatsoq ajornartorsiutitarpassuaqartoq, Issittumi annertusiartuinnartussanik. Uulia oqimaatsoq atorlugu svovlimik pilersitsisarpoq, tamatumalu saniatigut uulianit oqitsunit akuiarneqarsimasunit paamik annertunerujussuarmik pilersitsisarpoq. Paap sermeq qernertunngortittarpaa sukkanerusumillu aakkiartortillugu, tamatumuunakkullu nunarsuup kissatsikkiartornera sakkortusineqarpoq.
Tamanna peqatigalugu uuliamik oqimaatsumik uuliaarluerneq issittumi avatangiisinik sunnertiasunik ulorianartorsiortitsisorujussuussaaq. Uulia oqimaatsoq issittumi kigaatsuinnarmik arroriartortarpoq, upalungaarsimanerillu annikitsuummata silarluttarneralu pissutigalugu sukkasuumik saliiniarnissaq ajornakusoorpoq. Tamanna peqatigalugu uumassuseqarnera akornusersoruminartuullunilu aserorteruminartuuvoq.
HFO Qalasersuaq Kujallermi inerteqqutaasoq
Taamaattumik HFO umiarsuarmi orsussatut Sikuiuitsumi Kujallermi inerteqqutaalereersimavoq.
Sikuiuitsumilu Avannarlermi immap sikuata annikilliartornera ilutigalugu umiarsuit tamaani angallattut amerleriapiloortussaammata HFO-p inerteqqutigineqalernissaa ukiuni kingullerni isumaqatigineqaleraluttuinnarpoq.
Allaaserisaq tamakkerlugu linki atorlugu atuarneqarsinnaavoq. Pisartagaqariinngikkuit akiliillutit iserfigiuk.