Nunatsinni tusarnaartitseqataarnerit annersaat aallartilerpoq

Nunaqarfiit illoqarfiillu 30-it missaanniittut operamik erinarsortartumit Josef Josefsenimit aamma pattattartumit Jim Milnemit tikeraarneqartussanngorput. Inoqarfiit tikinneqartut suli amerlanerusimassagaluarput kulturimut aningaasaliissutinit tapiiffigineqarsimasuuppata.

Angalanissaq Josef Josefsenimit piareersarneqarsimavoq taannalu ataasinngormat Qeqertarsuatsiaani aallartissaaq juulip aallartilaarnerata tungaanut ingerlanneqassalluni.

- Aatsaat siullermeerutaasumik Nunatsinni inoqarfiit taama amerlatigisut tusarnaartitseqattaarluni angalanermi ataatsimi tikinneqartussanngorput. Uagullu kissaatigisimavarput nunaqarfiit qaqutikkuinnaq tikinneqartartut aamma tikinnissaat, Josef Josefsen Sermitsiaq.AG-mut oqarpoq.

Angalanissamut aningaasartuutit 1 million koruunit sinneqarput tassanilu angalanissamut najugaqarnermullu aningaasartuutit nipilersortullu akissarsiassaat matussuseqarneqassapput. Taamaakkaluartoq amerlanerusunik aningaasaliiffigineqarnissaq kissaatigisimagaluarpaat.

Qaanaaq qularnarpoq
- Ajuusaarutigaarput kulturimut aningaasaliissutinut qinnuteqaatitta itigartinneqarnera. Ilisimatinneqarsimagaluarput kulturimik suliaqartut pinngorartitsisullu ilinniarluarsimasut taakku atugassarigaat. Taamaammat itigartinneqarnerput pakatsissutigaarput tamannalu pissutigalugu tikikkusutaraluatta ilaasa tikinnissaat suli qularnarpoq, Josef Josefsen oqarpoq.

Taamaattoq Qaasuitsup Kommunianit, Qeqqata Kommunianit, Kommuneqarfik Sermersuumit, NunaFondenimit, Aningaasaateqarfik Sermeq-mit, tipsernermut aningaasaateqarfimmit kiisalu KNI A/S-mit taperneqarsimapput.

Angalanermi erinarsugassat piareerput. Kalaallisut, islandimiusut, qallunaatut, svenskisut, norskisut, tuluttut, tyskisut italiamiutullu erinarsortoqassaaq.

- Siorna kujataaniippugut ukiormannalu Arsummiit avannamut angalaarniarpugut. Aamma neriuppugut tapiissutit naammatsissappata Qaanaaq eqqaalu angalaarfigisinnaassallugit, Josefsen oqarpoq.