pineqaatissinneqarsimasut
Nunatsinni tigummineqartussatut pineqaatissinneqarsimasut amerlanipilussuit
Pinerluttulerinermik inatsit naapertorlugu ukiut qulit sinnerlugit inissiisarfimmiittussatut pineqaatissiisoqarsinnaanngilaq. Inissinneqartulli ilaat sivisunermik inissiisarfimmiittarput. Tigummineqartussatut pineqaatissiinerit Kalaallit Nunaanni Danmarkimiit atorneqarnerujussuupput
Kalaallit Nunaanni pinerluttut sakkortuumik pineqaatissinneqartarput.
Kalaallit Nunaanni Danmarkimilu tigumminninnissamik pineqaatissiinerit amerlassusaat assersuukkaanni takuneqarsinnaavoq kalaalerpassuit inatsimmi sakkortunerpaamik pineqaatissiissummik eqqartuunneqartartut.
- Kalaallit inissiisarfimmiittut sisamararterutaat, 24 procentit, tigummineqartussatut eqqartuunneqartarput. Danmarkimi taakku 2 procentiupput, Ilisimatusarfimmi ph.d. lektori Annemette Nyborg Lauritsen oqarpoq.
Sivusunerujussuarmik tigummineqartartut
Ilisimatusarnermik suliniut ingerlappaa, ilaatigut pineqaatissinneqarsimasut tunuliaqutaat, pinerliivigisaminnut attaveqarnerat akunnerminnilu attaveqarnerat misissorlugu.
- Kalaallit Nunaanni pinerluttulerinermik inatsimmi sivisunerpaamik pineqaatissiinissami ukiut quliupput. Tigummineqartussatullu pineqaatissinneqartoq ilaannikkut sivisunerujussuarmik tigummineqartarpoq. Inissiisarfimmiittunit 28-nit 2016-imi upernaakkut Herstedvesterimiittunit arfineq-marluk ukiut qulit 15-illu akornanni tigummineqarsimapput. Arfinillillu ukiut 15-it sinnerlugit inissiisarfimmiillutik, nassuiaavoq.
Amerlisimaqisut
Piffissap ingerlanerani tigummineqarnissamik pineqaatissiinerit amerlisimaqaat.
- 1994-imi kalaallit pineqaatissinneqartut arfineq-pingasut Herstedvesterimiipput. 2016-imi 28-upput, Annemette Nyborg Lauritsen oqarpoq.
Soormiuna taama amerlatigisut tigummineqartussatut pineqaatissinneqartartut?
- Suliani allassimavoq sakkortuumik pinerluuteqarsimasut. Tamanna tigumminninnissamik pineqaatissinneqarnissami piumasaqaatit ilagisarpaat. Aammali allanik nassuiaatissaqarsinnaavoq, Annemette Nyborg Lauritsen oqarpoq.
Allaaserisaq tamaat AG-mi uani sapaatip-akunneraneersumi atuaruk. Aviisi uani pisiarisinnaavat: