silap pissusaa
Nunatsinni sermimi qupparsuaq nassaarineqartoq
Nunatta avannaata kippasissortaani Petermannip Sermiani quppaq silaannarmit assilisaq NASA-p saqqummiuteqqammerpaa.
Amerikamiut avataarsualiartarnermut aqutsisoqarfiata NASA-p, Nunatta avannaata kippasissortaani Petermannip Sermiani qupparsuaq silaannarmit assilisaq ullualuit matuma siorna saqqummiuteqammerpaa.
Atuaruk: Sermeq iigartartoq ilanngarujussuartoq
Washingon Post taama allappoq, tassani quppaq aamma takuneqarsinnaavoq.
Hollandimi professori kalerriuteqartoq
NASA-p timmisartoq aallartitaa professorimit Hallandimeersumit qaammataasiamit assilisanit misissuisimasumit kalerrinneqareernerup kingorna, sapaatip-akunnerata siuliani Nunatta avannaata kippasissortaani quppaq nassaariniarlugu ulluni arlalinni timmisartorput.
Quppat marluk imminnut qanittut
Quppaq sermip qeqqata qanittuani inissisimammat NASA-mi annertuumik tupigusuutigineqarpoq. Sermimi qupparsuup inissisimanera nalinginnaanngilluinnarpoq, taamaammallu tupigusutsitsivpoq.
Tamatuma saniatigut qupparsuaq qupparsuup allap anginerusup qanittuani inissisimavoq, taanna piffissami kingullermi alliartuinnavippoq. Qupparsuit taakku marluk ullut ilaanni naapissagaluarunik, taava sermip ilarujussua kaanngarsinnaasoq NASA-mit oqaatigineqarpoq.
Sermeq kingullermik 2012-imi kaanngarpoq
Petermannip Sermianit sermerujussuaq ukiut arlaqanngitsut matuma siorna kaanngarpoq. Tamanna 2012-imi kingullermik pivoq, tassani 120 kvadratkilometerisut angissusilik kaanngarpoq.
Taanna qeqertap Manhattanip marloriaataanit anneruvoq.
Petermannip Sermia Kalaallit Nunaanni Sermit annersaasa ilagaat.