Nunatsinni sakkutooqarfik illersornissaqarfiup atuleqqippaa

Danskit sakkutuui Kangilinnguani Arsuup Kangerluani sakkutooqarfeqaleqqissapput, illut nungullarsimasut kingoraartissanut ikummatissanut atortunullu sillimmasiivittut atorneqalissallutik.

Aammattaaq sakkutooqarfik 'sungiusarnernut aamma ilinniarnernut siunertanut' atorneqartassaq, tamanna partiit illersornissamut isumaqatigiissutigisaanni, Danmarkip Issittumik siunissami suliaqarnissaanut isumaqatigiissummi atuarneqarsinnaavoq.

Illersornissamut qullersaqarfiup sakkutooqarfik 1942-mi Amerikamiunit sananeqarsimasoq, septembarimi 2014-imi qimakkaluarpaa, sakkutooqarfiullu isaterneqarnissaanut suliarinnittussarsiorlutik.

Sakkutooqarfiup Kangilinnguit nungullarsimasup atuutileqqinneqarnera, Kalaallit Nunaata aamma Issittup ukkatarineqarnerulerneranut ilaasutut isigineqassaaq.

Danskit nutaamik isumaqatigiissuteqarneranta aamma Issittumi suliaqarnissamut ukiumut 120 millionit koruuninik nukittorsaavigineqarpoq.

Tamannalu illersornissamut ministerinngortumut, Claus Hjort Frederiksenimit (V) naammagisimaarneqarluarpoq.

- Issittumi iliuuseqarneq nukittorsarniarlugu, ilaatigut qaammataasatigut alapernaarsuineq annertusillugu, pitsaanerusumik attaveqaqatigiinnissamut periarfissatigut aamma suliaqartut amerlanerulernissaannut, illersornissamut isumaqatigiissusiortut partiit akornanni annertuumik isumaqatigiittoqarnera nuannaarutigaara, taanna tusagassiuutinut nalunaarummi oqarpoq.

Aningaasat ilaatigut qaammataasat atorlugit alapernaarsuinerulernermut aamma timmisartunik alapernaarsuutinik akunnerni amerlanerusuni timmisalernissamut atorneqassapput.

Tamatuma saniatigut Nuummi Issittumi Sakkutooqarfimmi sulisut amerlineqassapput, kiisalu Illersornissaqarfiup sorsuuteeraannik sikoqannginnerani Kalaallit Nunaannut nassiussinissamut millioninik marlunnik kisitsisitaqartunik aningaasaliisoqassaaq.

/ritzau/