Naatsorsueqqissartarfik
Nunatsinni pisisinnaassuseq qaffariaateqartoq
Naatsorsueqqissaartarfiup kisitsisaataasa nutaat takutippaat, 2016-imi Nunatsinni najuaqartut agguaqatigiisillugu isertitaat 4 procentimik qaffariaateqarsimasut
Innuttaasut pisisinnaassuusaat 2016-imi qaffariaateqarpoq.
Tamanna Naatsorsueqqissaartarfiup 2016-imut isertitanut kisitsisaataasa nutaat takutippaat.
2016-imi innuttaasut 14-it sinnerlugu ukiullit agguaqatigiissillugu tamakkiisumik 240.000 kr.-inik isertitaqarsimapput, kisitsisit takutippaat. Tassa ukiup siulianut sanilliunnerini 4,8 procentimik qaffariaateqarsimallutik.
Illoqarfiit pingaarnersaanni innuttaasut isertitaqarnerusut
Nunatsinnilu illoqarfinni tamani tupaallaatissaanngitsumik Nuummi agguaqatigiisillugu isertitarineqartut qaffasinnersaapput.
2016-imi illoqarfiit pingaarnersaanni innuttaasut agguatigiisillugu 312.000 koruuninik isertitaqarput, Sisimiunilu Ilulissanilu innuttaasut agguaqatigiisillugu 250.000 aamma 238.000 koruunit isertitaqarineqarsimapput.
Ilulissani innuttaasut isertitamikkut qaffariaateqarnerpaasimapput, taakku ukiup siulianut sanilliullu isertitaat 23.500 koruuninik qaffariaateqarsimagamik, tassa isertitat qaffariaataat 10,9 procentiulluni. Qaasiuitsup Kommuniani immikkoortortaqarfinni allani aamma isertitat qaffangaatsiarsimapput, agguaqatigiissillugu isertitat taakkunani 8 procent sinnerlugu qaffassimallutik.
Illoqarfiit nunaqarfiillu assigiinngequterujussuat
Nunaqarfinnillu isertitarineqartut qaffasissusaat illoqarfinnut sanilliunnerini appasinnerungaatsiarput. Nunarput tamakkerlugu illoqarfinni innuttaasut agguatigiisillugu 233.000 koruuninik isertitaqarsimapput, nunaqarfinnilu innuttaasut 165.000 koruuninik isertitaqarsimallutik.
Qaanaap nunaqarfiani Qeqertami innuttaasut agguaqatigiisillugu 95.000 koruuninik isertitaqarsimasut, 2016-imi Nunarput tamakkerlugu isertitakinnersaapput.