Nuuk
Nunatsinni nutaarsiassat sarsuasut siullersaat
KNR-p tallimanngormat Kalaallit Nunaanni Brugseni suleqatigalugu, Nuup illoqarfiata qeqqani pisuinnaat aqqutaanni Brugsenip ´Sky-walk´-iani Nunatsinni nutaarsiassat sarsuasut siullersaat takuteqqaarpaa
KNR naapertorlugu Kalaallit Nunaanni Brugsenip KNR-illu suliassaq sivisuumik suleqatigiissutigisimavaat, taamaasilluni KNR-p nutaarsiassaatai paasissutissiissutaalu allat illoqarfiup qeqqani maanna takuneqarsinnaalerlutik.
– Suliniut piviusunngortinneqarpoq KNR atuisartutsinnut saqqumilaarnerulersinniarnerata ilaatut, neriuutigaarpullu soqutiginnittut tusagasseeriaatsitsinnut nutaamut siunnersuuteqarlutillu isumassarsianik saqqummiussisassasut, KNR-p pisortaa Søren Lennert Mortensen oqarpoq, nangillunilu:
– Inuiaqatigiinni paasissutissiiffiusuni inuuvugut, siunissamilu Nuummi pisuinnaat aqqutaanni ´tuniniaavillit´ tamarmik nunami nutaarsiassanik paasissutissanillu pilersorneqarnersaalissapput.
– Tassami KNR-p skærmi tamakkiisumik nammineq atussavaa. Taamaasilluni KNR-mi radio-kut tv-kullu nutaasiassat, aammalu programminut paasissutissat, siunissami skærmimi takutinneqartassapput, aammattaarli innuttaasunut paasissutissat pingaarutillit tusagassiivimmi nutaami ilanngunneqaratssapput, soorlu nunarsuarmi illoqarfiit pingaarnersaanni allani taamaattoqartoq, KNR tusagassiorfinnut nalunaarummini allappoq.