Nunatsinni nittartakkakkut aviisi nutaaq

Oktoberip aallaqqaataani nittartakkami aviisi Qeqqa.gl saqqummissaaq.

Saqqummersitsisoq Aviaq Mørch, atuagassiq 'greenland today' aamma aviisi akeqanngitsoq 'Nuup Qeqqa' Nuummi saqqummersittareerpai.

Qitiusoq
- Siunertaanikuugaluarpoq aviisi 'Nuup Qeqqa' nittartakkamiilernissaa. Kisianni maanna Qeqqanik taavarput, ima paasillugu nunap qeqqa. Taamaalilluta Kalaallit Nunaannit tamanit peqataaffiusumik ammaassivugut. Ataatsimoorfissamik illoqarfimmiikkutta nunaqarfimmiikkuttaluunniit, Danmarkimi imaluunniit tunumi pisariaqartitsivugut, Aviaq Mørch tusagassiuutinut nalunaarummini erseqqissaavoq.

Inunnik oqaluttuat
Aviisi nutaaq pisortanit soorlu Namminersorlutik Oqartussanit nutaarsiassanik, Qeqqa.gl-ip nammineerluni inunnik oqaluttuaanik aamma nunatsinni pisunik imaqartassaaq. Ilaannikkullu atuaasartut akornanni oqallittoqartassalluni.

- Ukiuni arfineq-pingasuni 'greenland today' silarsuup ilaa Kalaallit Nunaat pillugu oqaluttuarfigisareerpaa. Maanna aamma maani nunatsinni oqaluttuassatsialaat oqaluttuariniarpagut. Qeqqa.gl-imi nunarput piffittaassaaq oqalliffik oqaaseqartarfik inuit imminnut akerartuunnatik oqallittarfissaat. Tassami oqallittuni akerartuuttoqarajuppoq. Tamannalu uagut allanngortinniarparput, taamaammat akerartuillutik allattut peerneqartassapput. Taamaalilluta neriuutigaarput amerlanerusut oqaaseqaateqartassasut, isummanik avitsillutik, saqqummersitsisoq oqarpoq.

Nittartakkami aviisi
Kalaallit Nunaat siornatigut arlalinnik nittartakkatigut aviiseqartarnikuupput. 2004-mit aamma 2010 ilanngullugu Bornholmimi tusagassiortup webavisen.gl saqqummersittarpaa. Aningaasatigut ajornartorsiorneq peqqutigalugu matusariaqarsimavoq.