Nunatsinni najugaqariaaseq nutaaq misiligutigineqalersoq

Suliniut Venedig Biennale 2012-mi siullermik plakatitut takusassianngorlugu saqqummiunneqarpoq, maannalu piviusunngotillugu sanaartorneqalerpoq.

2017-imi illu misiligut Nuummi C.E Janssensvejip naanerani sananeqassaaq.

Nunatsinni silaannatsinnut nunallu ilusaanut naleqqussarluarsinnaasunik nutaanik illuliortaatsitut ilusiliiniarneq siunertaralugu misiligutitut illuliortoqassaaq.

Plastikkertalik
Silap pissusaanut assigiinngitsunut immikkoortunut marlunnut tulluarsakkamik issittumi inissiamik qanoq sanasoqarsinnaanersoq qulaajarniarlugu misiliisoqarniarpoq.

Illu misiligut silap pissusaanut assigiinngitsunut marlunnut immikkoortunut, kissartumut nillertumullu tulluarsagaavoq. Taakku silap pissusiinut tulluarsakkat immikkoortut assigiinngitsut marluk qisummik, polykarbonatimik qallerlugit sanaartorneqassapput.

Taamaalilluni illup qalliutaa silarleq, qisummik sanaap qaavaniittoq, illu naatsiiviusatut pissuseqassaaq, taamaalillunilu taakkunani immikkoortuni marlunni kissaq – pingaartumik ukiukkut – assigiinngitsorujussuussaaq.

Isugutak, nukissiuutit, anorimik sunnerneqarneq nillertorlu
Suliniut Venedig Biennale 2012mi saqqummersinneqartunut ilaasoq Danmarks Tekniske Universitetimit (DTU) aamma Tegnestuen Vandkunstenimit suliaavoq.

Ilaqutariit illumi assigiinngitsunik uuttortaasartussat DTU-mit inissinneqassapput. Kalaallit Nunaata silaannaanut issittumi, isugutak nukissiuutillu eqqarsaatigalugit, illu qanoq issanersoq paasiniarnissaa pingaarnertut siunertaavoq.

- DTU-mi ilisimatooq ilaquttanilu illumi najugaqarnissaa naatsorsuutigineqarpoq. Ukiut marluk ingerlaneranni nukissiuutinik atuineq uuttortassavaat nalinginnaasumillu illumi najugaqarnermit nalilersuissallutik, Bilo Høegh Stigsen, Kommuneqarfik Sermersuumi pilersaarusiornermut ingerlatsisoq oqarpoq.

Silarluttumiissinnaava?
- Sanaartorneq najugaqarnerlu pitsaasuuppat kingornatigut annertuumik sanaartortoqarnissaa naatsorsuutigineqarsinnaassaaq. Qanorluunniit inerneqaraluarpat aatsaat ukiut marlussuit qaangiuppata inernerit pissanganarluinnartut takusinnaassavagut.

Tamatuma saniatigut Issittumi ilaqutariinnut ataatsimut illu silap pissusiinut assigiinngitsunut marlunnut tulluarsagaq isumassarsiatsialaanersoq, aammalu polykarbonatimik qallersugaq anorimut nillertumullu atussallugu qajannaatsuunersoq, paasissallugu taassuma qilanaaraa.

Illu misiligutip suliarineqarnera 2017-ip ukiaanerani ingerlanneqarnissaa naatsorsuutigineqarpoq. Ukioq taanna ukiakkut illu nuuffigineqarsinnaassaaq pilersaarutit malillugit naammassineqassappat.

Atuaruk: Nunatsinni sanaartupiloorneq: Jyllandip avannaani suliffeqarfiit tikilluaqqusaapput