Nunatsinni maajimi pueqqungaatsiartoq

Nunatsinni pinngaartumillu Tunup avannaarsuani maajimi nalinginnaasumit nillerneruvoq. Tamatumunnga silaannaap nillertup kissartullu aporaaffiata inissisimaffia pissutaasoq DMI nittartakkamini allappoq.

Silasiortup John Cappelenip kisitsisit misissuataarsimavai. DMI uuttuisarnerit 1949-mi aallartinneranniilli maajip aatsaat taama nillertigineranik Danmarkshavnimi nalunaarsuisimavoq.

- Danmarkshavnimi aatsaat taama issitsigaluni agguaqatigiissillugu -11,1°C gradinik ississimavoq. Tamatumani nalinginnaasoq aallaavigineqartoq piffissami 1961-ip 1990-illu akornanni uuttortarneqarsimasoq tassaavoq -6,5°C, John Cappelen oqarpoq nangillunilu:

- Daneborgimi qimussimik alapernaarsuisartut Siriusikkut angerlarsimaffigisaanni taamatuttaaq nillingaatsiarpoq agguaqatigiissillugu -9,0 gradinik issilluni. Taamaalilluni ukioq manna maaji tassaalerpoq 1958-imi uuttuisarnerit aallartimmatali nillernerpaap tullia.

Nunarput tamakkerluni

Tunup avannaarsuaniinnaanngitsoq issippoq. Kalaallit Nunaata sinnerani nalinginnaasumit aamma nillerneruvoq, Silap nillerneranut pissutaalluinnartoq tassaavoq silaannaap nillertup kissartullu aporaaffiata inissisimaffia.

Aporaaffiup silaannaq nillertoq Qalasersuup nalaaneersoq silaannarmit kissarnerusumit Ækvatorimeersumit immikkoortittarpaa. Aporaaffik aalaakkaasuunngilaq, kisiannili avannamut kujammullu illuaqattaartarluni. Maajimi Kalaallit Nunaata kujataaniinneruvoq, taamaalillunilu nunarput silaannarmi naqitsinertuffimmi nillertumiinnerusimalluni.

Naqitsiniisaaffiit Kalaallit Nunaata sineriai atuarlugit akuttunngitsumik ingerlaartarput, taakkualu kiammut maqitsissutitut atuuttarlutik. Issinnerujussuanilli naqitsiniisaffiit ingalassimaartinneqarsimapput.