Røde Kors
Nunatsinni inuusuttunut atugarliortunut tapiissutit millionillit
Islandimi Kalaallillu Nunaanni Røde Korsit ukiuni pingasuni suleqatigiinnerannut tapiissutitut Islandip Kalaallillu Nunaata akornanni siumut utimullu angalanerit 15-it tunniunneqarput
Islandimi timmisartortitseqatigiiffik Air Iceland Islandimilu Røde Kors (IRC) ippassaq tallimanngornermi suleqatigiinnissamik isumaqatigiissummik atsioqatigiipput.
Siunniunneqarporlu Islandimi Kalaallillu Nunaanni Røde Korsit suliniutinut aalajangersimasunut suleqatigiinnerisa annertusarneqarnissaa.
Tassami Islandimi Kalaallillu Nunaanni Røde Koresit ukiuni pingasuni suleqatigiinnerannut tapiissutitut Islandip Kalaallillu Nunaata akornanni siumut utimullu angalanerit 15-it tunniunneqarput.
Taamatut tusagassiorfinut nalunaarutikkut allappoq Kalaallit Røde Korsiat.
Tapiissutit millionillit
– IRC Kalaallit Nunaanni inuusuttunut atugarliortunut suliniutinut aalajangersimasunut ukiuni pingasuni 1,5 millioner koruunit angullugit tapiissuteqarniarpoq, Kalaallit Røde Korsiat allappoq.
Kalaallit islandimiullu ingerlatsivii juunimi suleqatigiinnissamik isumaqatigiissummik atsioqatigiipput, maannalu taanna KR Nuuk-p aamma IRC Reykjavikip akornanni suleqatigiinnissamik isumaqatigiissutaannik malitseqartinneqarpoq.
Nunani kattuffiit taakkua allanissaaq isumaqatigiissuteqassamaarput.