isumaqatigiissut
Nunatsinni ilisimatusarnermut millionit
Ministerip tikeraarneranut atatillugu isumaqatigiissummik atsioqatigiittoqarpoq, taanna ilisimatusarnermut millioninik qulingiluanik qulakkeerinnippoq
Ulluni makkunani qallunaat ilinniartitaanermut ilisimatusarnermullu ministeriat Ulla Tørnæs (V) Nunatsinnut tikeraarpoq.
Tassunga atatillugu ilinniartitaanermut, kultureqarnermut, ilisimatusarnermut ilageeqarnermullu naalakkersuisoq, Nivi Olsen (D) aamma ministeri Danmarkimeersoq isumaqatigiissummik atsiorput.
Taassuma Pinngortitaleriffimmi Silap Pissusianik Ilisimatusarfiup aammalu Ph.d.-tut aamma postdocstipendianik ilinniakkat arlaqartut aningaasalersorneqartarnerata ingerlaannarnissaat qulakkeerpaa.
Issittumi ilisimatusarnermi ineriartortitsineq
- Isumaqatigiissut danskit kalaallillu ilisimatusarnerup tungaatigut pingaartorujussuarmik ingerlatsinerisa ingerlatiinnarneqarnissaanut aalajangiusimaneqarnissaanullu tunngaviuvoq, aammalu issittumi ilisimatusarnikkut piginnaasat pigiinnarneqarnissaannut, Pinngortitaleriffimmi pisortaq, Klaus Nygaard tusagassiuutinut nalunaarummi oqarpoq.
Naalakkersuinikkut oqaloqatigiinnerit saniatigut naalakkersuisut taakkua marluk peqatigiillutik Pinngortitaleriffik, Silap Pissusianik Ilisimatusarfik aamma Ilisimatusarfik pulaarpaat.
Atuaruk: Issittumi ilisimatusarnikkut Kinamik qaninnerusumik attaveqalerneq
Ataavartumik suleqatigiinneq
Ulla Tørnæs ilaatigut paasissutissinneqarpoq, nunatsinni ingerlaqqiffiusumik ilinniartitaanerit ilisimatusarnerlu pillugit, kiisalu kalaallit isummersuutaannik paasissutissinneqarluni danskit issittumi ilisimatusarnermut tunngasunik ingerlatsinerannut atatillugu, - taanna 2016-imi naammassineqartussatut naatsorsuutigineqarmat.
Ingerlatsiviit taakku marluk danskit aamma nunani allamiut ilisimatusartut Kalaallit Nunaanni najuunnissaat pingaartillugu oqaatigaat, ingerlaavartumillu ilinniartitaanikkut ilisimatusarnikkullu suleqatigiinnerup nukittorsarneqartuarnissaa.